Kryetari i bashkisë së Korçës, Sotiraq Filo priti në një takim kryetaren e komunës së Preshevës, Ardita Sinani dhe stafin e saj.

Gjatë takimit, Filo dhe Sinani biseduan rreth mundësive për aplikime të përbashkëta për fonde të Bashkimit Europian, si edhe për kuota të dedikuara për maturantët e Preshevës që do të zgjedhin të studiojnë në degët e Universitetit “Fan S. Noli” në Korçë.

“Binjakëzimi i Preshevës me Korçën nuk është vetëm një marrëveshje institucionale, por është forcimi i lidhjeve tona kombëtare dhe një mundësi e hapur bashkëpunimi në fushën e arsimit, ekonomisë e shkëmbimeve kulturore”, tha Filo në një postim në rrjetet sociale.

Kryebashkiaku Filo u shpreh se “ky binjakëzim është dëshmia se shqiptarët kudo janë një, me një gjuhë, një kulturë dhe një të ardhme të përbashkët”.

Burimi ATSH