Mbledhja e dhjetë e Komitetit Kombëtar të Sistemit të Pagesave (KKSP), që zhvilloi punimet sot në Tiranë, nën drejtimin e Luljeta Minxhozit, zëvendësguvernatore e Parë e Bankës së Shqipërisë, vuri theksin në lehtësimin e përfshirjes financiare të qytetarëve dhe rritjen e volumit të pagesave, përmes proceseve të digjitalizimit.

Përveç anëtarëve të Komitetit Kombëtar të Sistemit të Pagesave, në mbledhje morën pjesë përfaqësues nga qeveria shqiptare si dhe institucione të tjera të rëndësishme si Banka Botërore, Këshilli Evropian i Pagesave (EPC), dhe përfaqësues të kompanive ndërkombëtare të industrisë së pagesave. Në takim ishin të pranishëm edhe përfaqësues nga bankat, institucionet financiare jobanka, përfaqësues të operatorëve të skemave kombëtare të pagesave me kartë, si dhe stafi i Bankës së Shqipërisë.

Aktiviteti u hap me fjalën përshëndetëse të Guvernatorit të Bankës së Shqipërisë, Gent Sejko, i cili u shpreh se dhjetëvjeçari i fundit ka shënuar një revolucion në fushën e pagesave për tregun shqiptar, duke e transformuar rrënjësisht atë në çdo aspekt.