Stafi i Operatorit të Blerjeve të Përqendruara ishte promotor i një seminari produktiv, mbështetur nga TAIEX, për praktikat më të mira të organeve qendrore blerëse në Itali, Finlandë dhe Austri.

Gjatë këtij eventi, ekspertët nga BBG Austria, CONSIP Itali dhe Hansel Finlandë, ndanë njohuri dhe praktika të avancuara mbi efektivitetin e prokurimit të përqendruar, sistemet dinamike të blerjeve, përdorimin e katalogjeve elektronikë në prokurime, etj.

Ministri i Ekonomisë, Kulturës dhe Inovacionit, Blendi Gonxhja vlerësoi se ky workshop ishte një mundësi shumë e dobishme për të rritur kapacitetet dhe njohuritë e stafit të OBP-së, si edhe për t’u matur me më të mirët.

TAIEX është instrumenti i Asistencës Teknike dhe Shkëmbimit të Informacionit i Komisionit Evropian, që mbështet administratat publike në lidhje me përafrimin, zbatimin dhe forcimin e legjislacionit të BE-së, si dhe lehtësimin e shkëmbimit të praktikave më të mira të BE-së.

“OBP në vetëm 7 muaj nga nisja e aktivitetit si sh.a., nën Ministria e Ekonomisë, Kulturës dhe Inovacionit – MEKI, ka arritur rezultate që na bëjnë krenarë në numrin dhe suksesin e procedurave, shpejtimin dhe mirëadministrimin e praktikave, risitë e inovacionin digjital, hartimin dhe certifikimin në kohë rekord të shumë manualeve të mallrave e shërbimeve në ndihmë të enteve publike blerëse, si edhe duke rritur kursimin dhe zgjeruar konkurrencën e pjesëmarrjen e subjekteve ofertuese”, u shpreh Gonxhja.

(ATSH)