Kryeministri Edi Rama deklaroi sot se, Shqipëria është në vend të parë me 86% rritje të fluksit të turistëve sipas Komisionit Europian të Udhëtimeve.

Në fjalën e tij gjatë një takimi me kryetarët e bashkive për përshpejtimin dhe monitorimin e procesit të legalizimit, si prioritet i qeverisjes qendrore dhe asaj lokale, Rama u shpreh se, “sivjet faktikisht para pak ditësh Komisioni Europian i Udhëtimeve nxori një klasifikim dhe Shqipëria është në vend të parë me 86% rritje të fluksit të turistëve. Pastaj vijnë me radhë këtu në rajon Serbia me 48%, Mali i ZI me 31%, Greqi me 22%, Turqi me 20%, ndërkohë që shumë nga vendet perëndimore janë me rënie”.

“Pjesë e këtij sulmi është dhe një përpjekje shumë e ulët për të thënë që shqiptarët e Kosovës e kanë braktisur Shqipërinë, ndërkohë që fakti është që nga janari deri në qershor ka 1.7 milionë hyrje të qytetarëve të Kosovës ose 25% më shumë se vjet”, theksoi Rama.

Ndërkohë, shtoi Rama, që po të shohim të tjerët, italianët deri në qershor kanë qenë 486 mijë ose 57%. Ka një rritje shumë të fortë të turistëve turq 61% nga vjet. Pastaj turistët polak 74%, që kanë qenë nga të parët që kanë ardhur në Shqipëri, por kanë shkuar mbi 100 mijë deri në qershor.

“Ndërkohë aeroporti i Tiranës është në pamundësi për të dhënë leje për ulje të avionëve çarter, për shkak se nuk ka vend në 24 orë dhe për të ulur një çarter në aeroportin e Tiranës duhet të prenotosh 3 ditë përpara. Gjë që sigurisht do të adresohet sepse në aeroportin e Tiranës ka filluar një punë intensive për zgjerimin e pistës, për zgjerimin e vendeve të parkimit. Do të hapet aeroporti i Vlorës”.

(Marrë nga ATSH)