Kryeministri Edi Rama uroi sot presidenten e Parlamentit Europian, Roberta Metsola për rizgjedhjen në detyrë.
Rama theksoi se, “rikonfirmimi i besimit nga Shtëpia Evropiane e Demokracisë me një votim të jashtëzakonshëm prej 562 votash është një dëshmi e lidershipit të saj të besueshëm, energjisë dhe vizionit në krye të një prej institucioneve kyçe të Bashkimit Evropian në këto kohë sfiduese për të gjithë”.
Kreu i qeverisë u shpreh se rizgjedhja e Metsolës është një lajm shumë i mirë për rajonin dhe se Shqipëria pret me padurim të vazhdojë të punojë ngushtë me të.
“E dashur Roberta, rizgjedhja jote është gjithashtu një lajm shumë i mirë për rajonin tonë dhe Shqipëria pret me padurim të vazhdojë të punojë ngushtë me ju për të forcuar marrëdhëniet me BE-në, për të mbrojtur dhe mbështetur vlerat e përbashkëta evropiane, si dhe sigurinë, prosperitetin dhe solidaritetin e një BE që i përkasim dhe punojmë çdo ditë për t’u bërë pjesë”, shkroi Rama në platformën X.
(ATSH)
