Kryeministri Edi Rama tha sot nga Kotorri, Mali i Zi, ku ishte i pranishëm në punimet e samitit të liderëve të Ballkanit Perëndimor dhe Bashkimit Europian, se vendet Ballkanit Perëndimor duhet të kenë gati për samitin e ardhshëm një draftstrategji të tregut të përbashkët 2.0.

Rama nënvizoi se duhen intensifikuar takimet mes ministrave e Integrimit të rajonit, por edhe të Ekonomisë, Bujqësisë etj.

“Propozova që ministrat e Integrimit në BE dhe ministrat e Financave të takohen në mënyrë periodike për të diskutuar shtyllën 3 dhe 4 të Planit të Rritjes dhe kemi nisur tashmë takime periodike midis ministrave të Brendshëm dhe po kështu të ministrave të Arsimit, të Integrimit Europian, të Bujqësisë e kështu me radhë”, tha Rama.

“Këto takime duhet të strukturohen midis BE-së dhe rajonit, jo vetëm midis nesh. Të gjitha këto takime duhet të kenë synimin për t’i dhënë shtysë nga të gjitha anët punës për këtë objektiv strategjik që na ka sjellë këtu së bashku”, shtoi Rama.

“Do të ishte mjaft mirë që në takimin e ardhshëm të kishim një draft strategjik të tregut të përbashkët 2.0 që do të bashkërendohet nga Këshilli i Bashkëpunimit Rajonal, nga CEFTA dhe nga organizata të tjera rajonale, e po kështu dhe nga përfaqësuesit tanë”, nënvizoi Kryeministri Rama.