Presidenti Bajram Begaj zhvilloi një telefonatë me deputetin shqiptar në parlamentin e Serbisë, Shaip Kamberi.

Begaj i uroi Kamberit suksese për rizgjedhjen në parlamentin e Serbisë si përfaqësues i shqiptarëve të Luginës së Preshevës.

“Uroj që roli dhe kontributi Juaj të vijojë t’i shërbejë të gjithë shqiptarëve të Luginës së Preshevës, për adresimin e të drejtave të tyre legjitime. Mbështetja e Shqipërisë nuk do të mungojë”, i tha Begaj deputetit Kamberi.

Shaip Kamberi, udhëheqës i Partisë për Veprim Demokratik ka fituar edhe një mandat tjetër të përfaqësimit të shqiptarëve të Luginës së Preshevës në Kuvendin e Serbisë. Kamberi ka arritur votat e mjaftueshme që të bëhet deputet në Parlamentin e Serbisë sërish. Për herë të katërt, Kamberi do të jetë zëri i shqiptarëve në parlamentin serb.