Libri përmban këngë popullore të mbledhura nga bartësit e folklorit të arvanitëve në Atikë, transkriptuar me alphabet latin, në të folmet burimore të arvanitëve, me përkthim në gjuhën greke.

Autori ka koleksionuar të gjitha nënllojet e lirikës popullore arvanite, prej këngëve të dashurisë dhe të dasmës deri tek këngët-lodra, lirika rituale, këngët shpotitëse, me përqeshje miqësore ndaj ceneve morale e fizike, duke i mbledhur edhe nga biblioteka shtetërore e private.

Një pjesë të rëndësishme të librit e përbëjnë rrëfenjat popullore me karakter argëtues, didaktik dhe moral; shtuar me rrëfime që lidhen me figura reale të historisë arvanite. Më vete janë trajtuar emërtimet e vendeve, duke përfshirë mikrotoponimet, si kujtesë historike etnike e arvanitëve dhe si lëndë gjuhësore me elementë arkaikë.

Frazeologjizmat dhe urtësitë popullore, ushtrimet e thjeshta të vjershërisë dhe në mënyrë të veçantë leksiku i arvanitëve, shumë i pasur dhe i larmishëm në fjalë e forma, me një rëndësi të veçantë për një fjalor historik të shqipes; për studime krahasimtare midis shqipes mesjetare të bartur gojarisht dhe shqipes së shkruar në hershmëri; janë një thesar brenda thesarit që ka mbledhur akad. Titos Jochalas.

Leksiku është paraqitur në kontekste gjuhësore bindëse dhe është shpjeguar edhe përmes greqishtes.

Autori ka mbledhur lëndë gjuhësore e folklorike në të gjitha fshatrat e Atikës, të cilët paraqiten në fund edhe në një renditje alfabetike. Gjenden në libër edhe një koleksion kostumesh tradicionale popullore.

Akad. Titos Jochallas me të drejtë është quajtur albanologu i arvanitëve.

___________

www.akad.gov.al