Kryeministri i Holandës, Mark Rutte dhe kryeministri i Luksemburgut, Xavier Bettel do të vizitojnë javën e ardhshme Kosovën.
Vizita e Rutte dhe Bettel do të zhvillohet më 3-4 korrik.
Vizita e dy kryeministrave evropianë sipas gazetës holandeze ”Haarlems Dagblad” lidhet me tensionet e fundit në veri të Kosovës, sipas KosovaPress.
”Më 3-4 korrik, kryeministri Rutte do të vizitojë Serbinë dhe Kosovën, së bashku me kryeministrin e Luksemburgut, Xavier Bettel. Kjo vizitë ofron një mundësi për të diskutuar tensionin e rritur mes Serbisë dhe Kosovës dhe rëndësinë për shpërshkallëzimin dhe përkushtimin ndaj dialogut të drejtuar nga BE-ja për normalizimin e marrëdhënieve”, thuhet ndërkohë në njoftimin e qeverisë holandeze.
Përveç Kosovës, kryeministrat evropianë do të vizitojnë edhe Serbinë.
Tensionet në veri të Kosovës kanë filluar më 26 maj, kur kryetarët e zgjedhur në Zubin Potok, Zveçan dhe Leposaviq kanë shkuar në objektet komunale, të asistuar nga Policia e Kosovës.
Situata u përshkallëzua më 29 maj, kur grupet kriminale kanë sulmuar Policinë e Kosovës dhe ushtarët e KFOR-it, ku rreth 30 prej tyre u plagosën.
Komuniteti ndërkombëtar i ka drejtuar tri kërkesa kryeministrit Kurti, lidhur me situatën në veri, që kanë të bëjnë me shtensionimin e situatës, zhvillimin e zgjedhjeve të reja dhe kthimin në dialogun për normalizimin e marrëdhënieve Kosovë-Serbi, të ndërmjetësuar nga Bashkimi Evropian. /ATSH
