Kancelari i Republikës Federale të Gjermanisë, Olaf Scholz theksoi se, “Procesi i Berlinit ka treguar prej vitit 2014 se çfarë potenciali ndodhet në bashkëpunimin gjithëpërfshirës të 6 shteteve të Ballkanit Perëndimor”.

Gjatë konferencës së përbashkët me kryeministrin Rama në Berlin, kancelari Scholz tha se përparimet e Shqipërisë në negociatat e anëtarësimit evropian janë një sinjal shumë i mirë.

“Në takimin e fundit në nëntor pjesëmarrësit nënshkruan tre marrëveshje të rëndësishme për krijimin e tregut të përbashkët rajonal. Shqipëria priu me shembull të mirë dhe në janar ishte vendi i parë i rajonit që i ratifikoi të tri marrëveshjet. Ky është një model i mirë për rajonin, një përparim i rëndësishëm, sepse më një treg të përbashkët në rajon garantohen 4 liritë bazë: qarkullim i lirë i personave, mallrave, i shërbimit dhe kapitalit”, tha ai.

Scholz tha se, “integrimi i shpejtë i të 6 shteteve të Ballkanit Perëndimor në BE, dëshiroj ta ritheksoj, për qeverinë time gjermane ka rëndësi strategjike. Ne dëshirojmë t’i mirëpresim ata sa më shpejt të jetë e mundur si anëtar në BE”.

Kancelari teksa u ndal tek negociatat, u shpreh se thelbi i tyre është dhe mbetet forcimi i sundimit të ligjit, ku theksoi se anëtarë të rrjeteve kriminale por dhe zyrtarë të rangut të lartë në rajon, ndërkohë janë paditur dhe janë dënuar.

Gjithashtu ai tha se dhe mediet e lira dhe të pavarura janë pjesë përbërëse thelbësore e demokracive evropiane.

Ai u ndal edhe tek lufta në Ukrainë.

“Lufta e agresionit të Rusisë kundër Ukrainës, kundër një shteti sovran në Evropë na sjell në mënyrë të dhimbshme para syve që arritjet evropiane të dekadave të fundit dhe jeta në hapësirë të lirisë dhe demokracisë nuk janë të vetëkuptueshme. Ne duhet të angazhohemi çdo ditë për mbrojtjen dhe forcimin e tyre. Prandaj dua ta shfrytëzoj këtë rast për ta falënderuar Shqipërinë. Shqipëria merr përsipër në plan ndërkombëtar me rolin e saj konstruktiv si anëtar jo i përhershëm i Këshillit të Sigurimit të OKB-së, si anëtar i NATO-s, i OSBE-së dhe në shumë forume ndërkombëtare përgjegjësi të madhe. Ajo i mbështet vendimet e politikës së përbashkët të jashtme të sigurisë së BE me 100%”, tha Scholz.