Ministri i Mbrojtjes, Niko Peleshi shprehu sot mirënjohjen për efektivët e Forcave të Armatosura që u përfshinë pa u lodhur në operacionet e kërkim-shpëtimit pas tërmetit shkatërrues në Turqi.

Peleshi ndau në rrjetet sociale një video me dëshmi të efektivëve që morën pjesë në këto operacione, ndërsa theksoi se, “përpjekjet dhe puna e lavdërueshme e tyre, na e ngrenë kokën lart dhe na bëjnë të ndjehemi krenarë që ishim ndihmë në ditë të vështira për ata që patën nevojë”.

Nëntogere Hygerta Ilnica, pjesë e ekipit shëndetësor të FA-së, u shpreh se, situata në Turqi ishte drithëruese.

“U informuam se do të krijohej një grup gatishmërie që do të nisej për në Turqi për dhënien e ndihmës. Duke qenë se unë kam jetuar prej 7 vitesh në Turqi, sepse kam përfunduar studimet atje, Turqinë e kam parë gjithmonë si një vend mikpritës, të bukur, të gjallëruar, plot jetë. Ajo që pamë ne ishte e kundërta. Pamë ndërtesa të rëna përtokë, njerëz që ishin akoma në gjendje shoku, ishte një pamje shumë drithëruese për të gjithë ne”, tha ajo.

Major Endrit Cengu, komandant i kompanisë I të kërkim-shpëtimit, foli po ashtu për operacionin e zhvilluar për shpëtimin e jetëve.

“Gjatë rrugës pamë njerëz civilë që kishin nevojë për ndihmën tonë. Menjëherë organizova skuadrat i ndava në tre grupe dhe rezultati në këtë operacion ishte shpëtimi i një fëmije 5 vjeç dhe fatkeqësisht nxjerrja e 3 viktimave nga rrënojat. Pas kësaj detyre, ne morëm detyrë në një objekt me 8 kate që ishte rrënuar në një kat. Puna në këtë objekt ishte jashtëzakonisht shumë e vështirë pasi të gjitha katet ishin 1 mbi 1, por duhej kujdes dhe përkushtim në operacion për të mos rrezikuar si jetën e efektivëve që ndërhynë, por edhe personat që mund të qenë të gjallë brenda”, tha ai.

Nëntogere Aroxhena Mara tha se, ishte një katastrofë e vërtetë, ndërsa njerëzit kërkonin shpresë. “Ishte dëshpëruese që na shikonin në dritë të syrit, sikur ishim shpëtimtarët e vetëm për ta”, tha ajo.

Nëntoger Xhefri Xhafa tha se ekipi i kërkim-shpëtimit ka kryer një detyrë mjaft të vështirë dhe dinjitoze.

“Kemi operuar në një prej zonave më të prekura. Besoj se kemi bërë maksimumin e duhur për të ndihmuar ata njerëz që ishin në ato kushte mjaft të vështira”, tha ai. /ATSH