Kryeministri Edi Rama bëri të ditur sot se instrumenti i parë i paketës së re ligjore kundër dhunës urbane është akti normativ për dëmshpërblimin e menjëhershëm të biznesit të vogël.

Ky akt, sipas tij, vjen si mbështetje e menjëhershme financiare për ata që u dëmtuan nga thyerjet, grabitjet, zjarri.

Rama theksoi se me këtë akt shteti do të mbulojë nga 100% të dëmeve materiale për më të vegjlit deri te minimumi 70% për më të mëdhenjtë.

Kjo sipas tij, do të bëhet në bazë kriteresh të mirëpërcaktuara dhe gjithnjë brenda fashës së bizneseve me xhiron vjetore deri në 140 mijë euro.

Rama theksoi se me këtë akt normativ, bizneset të cilat i kanë depozituar tanimë aplikimet e tyre bashkëngjitur dokumentacionin e dëmeve pranë Drejtorisë së Përgjithshme të Tatimeve, nuk do të presin me vite procese gjyqësore për dëmshpërblimin e tyre.

Nga ana tjetër, Kryeministri theksoi se ata që u përfshijnë në ato akte ku thyen, shkatërruan, dogjën dhe dëmtuan bizneset dhe për të cilat gjykata e vlerësoi të ligjshëm arrestimin, do të paguajnë secili pjesën e vet të gjobës për dëmet e shkaktuara.

“Për dëmet e shkaktuara nga të miturit, përgjegjësia për mbulimin e pjesës së dëmit kalon te prindërit”, shtoi ai.

Marrë nga ATSH