Ambasadorja e Bashkimit Evropian në Shqipëri, Sofia Moreira de Sousa, vlerësoi ecurinë e Shqipërisë në procesin e anëtarësimit në BE, pas vizitës së Presidentes së Komisionit Evropian, Ursula von der Leyen në Tiranë.

Përmes një postimi në rrjetet sociale, ambasadorja Moreira de Sousa falënderoi Presidenten Von der Leyen për vizitën në Shqipëri, si dhe autoritetet shqiptare për mikpritjen.

“‘Qëllimi është tashmë afër’, tha Presidentja von der Leyen dhe Shqipëria është ndër vendet pararendëse të procesit të anëtarësimit. Ky është rezultat i viteve të tëra pune të palodhur nga shqiptarët”, u shpreh ajo.

Ambasadorja theksoi se faza e fundit e procesit kërkon vijimin e punës në disa fusha.

“Tani, faza e fundit është edhe më kërkuesja: forcimi i drejtësisë dhe shtetit të së drejtës, kuadrit zgjedhor dhe mbrojtja e natyrës së jashtëzakonshme të Shqipërisë”, u shpreh Moreira de Sousa.

Ajo nënvizoi njëherësh edhe rëndësinë e angazhimit të aktorëve politikë dhe dialogut me shoqërinë.

“Siç theksoi Presidentja, kjo kërkon angazhim të sinqertë të të gjithë aktorëve politike dhe një dialog të fortë e të vazhdueshëm me shoqërinë”, tha ambasadorja.

Moreira de Sousa veçoi edhe vizitën në shkollën “Emin Duraku”, duke e cilësuar atë si një prej momenteve që do të mbajë mend.

“Përmes EU4Schools, 63 shkolla janë rindërtuar ose rinovuar pas tërmetit të vitit 2019, dhe fëmijët që mësojnë sot në këto shkolla janë arsyeja pse kjo punë ka kaq shumë rëndësi”, tha ajo.

Ambasadorja e BE-së theksoi rëndësinë që do të kishte anëtarësimi i Shqipërisë edhe për vetë Bashkimin Evropian.

“Kur Shqipëria të anëtarësohet, do ta bëjë edhe Union tonë më të fortë”, përfundoi Sofia Moreira de Sousa.

Burimi ATSH