Programi i Ekselencës dhe Programi Kombëtar i Praktikave të Punës janë dy nisma të qeverisë që mundësojnë integrimin e të rinjve të diplomuar në administratën publike shqiptare.

Zëvendëskryeministrja Albana Koçiu ndau sot eksperiencat e dy të rejave, të cilat janë integruar tashmë në administratën publike, falë këtyre programeve.

Njëra prej tyre, Juli, tregoi se se ka hyrë në thirrjen e shtatë të Praktikave të Punës përpara dy viteve.

“Unë jam një rast suksesi dhe i bëj thirrje çdo të riu për të parë çdo lloj mundësie që i vjen në jetë si një pikënisje. Një pikënisje e cila shumë lehtë nëpërmjet punës, angazhimit, përthithjes së eksperiencës profesionale që mund të marrë në administratën publike, shumë mirë mund ta kthejë këtë mundësi në një histori suksesi”, u shpreh ajo.

Ndërsa Megi, e cila vinte nga studimet jashtë vendit u bë pjesë e kabinetit të Kryenegociatores për Integrimin, falë programit Kombëtar të Praktikave të Punës.

“E nisa eksperiencën duke menduar që janë aftësitë teknike ato që bëjnë diferencën. Kam kuptuar që janë jashtëzakonisht të rëndësishme, por kryesorja është qasja që është në punë, të tregohesh proaktiv dhe mendoj që kjo të çon goxha larg dhe kupton dhe veten dhe arrin të kontribuosh në mënyrë praktike”, u shpreh ajo.

Programi i Ekselencës garanton punësimin direkt 1-vjeçar për studentët me rezultate të larta (mesatare 9-10), ndërsa Programi Kombëtar i Praktikave të Punës vjen përmes një praktike profesionale 3-mujore me mundësi rinovimi.

Burimi ATSH