Në kuadër të përgatitjeve për edicionin e radhës të Tirana Economic Forum, që do të zhvillohet më 3 dhjetor 2026, në Tiranë, Ambasadorja Luela Hajdaraga zhvilloi një takim me Symeon Tsomokos, President i Delphi Economic Forum.

Sipas ambasadës shqiptare, takimi u përqendrua në përgatitjet për këtë ngjarje të rëndësishme, e cila do të mbledhë në Tiranë liderë politikë, ekonomikë, të biznesit dhe diplomacisë për të diskutuar mbi sfidat dhe mundësitë që formësojnë të ardhmen e Shqipërisë, Evropës dhe rajonit.

Agjenda e Forumit do të fokusohet në bashkëpunimin rajonal, integrimin në Bashkimin Evropian, investimet, diversifikimin ekonomik, sigurinë energjetike, transformimin urban, projektet e real estate, si dhe rolin e teknologjisë dhe Inteligjencës Artificiale në rritjen e së ardhmes.

“Tirana Economic Forum vijon të përbëjë një platformë të rëndësishme për dialogun e nivelit të lartë, shkëmbimin e ideve dhe forcimin e bashkëpunimit dhe partneriteve në rajon”, shkruan ambasada shqiptare, në postimin e saj në rrjetet sociale.