Kryeministri Edi Rama, bëri të ditur sot se ka nisur integrimi i modeleve të inteligjencës artificiale në administratën publike.

Në Forumin e Dytë të Inovacionit, me fokus te Inteligjenca Artificiale dhe zhvillimi i sektorit të teknologjisë në Shqipëri, Rama informoi se ky proces ka nisur fillimisht në drejtoritë juridike dhe më pas do të ketë shtrirje në të gjitha nivelet.

Ai deklaroi se programi kombëtar për aftësimin në teknologjinë e inteligjencës artificiale do të hapet për individët dhe do të bëhet i detyrueshëm për administratën publike.

“Kemi filluar një proces integrimi të moduleve të inteligjencës artificiale me administratën publike në nivelin e parë, fillimisht me drejtoritë juridike dhe do të shtrihemi në të gjitha nivelet për t’i dhënë mundësi administratës që të ketë në dispozicion një asistencë jashtëzakonisht të kualifikuar përmes moduleve të inteligjencës artificiale”, tha ai.

Ndërkohë, kreu i Ekzekutivit theksoi se do të shtohen grantet për “financimin nëpërmjet Fondit të Inovacionit për Kërkim të Aplikuar dhe Partneritete mes Universitetit dhe Industrisë, pikërisht aty ku sot kemi edhe vështirësinë dhe prapambetjen më të madhe”.

Burimi ATSH