Ministrja e Ekonomisë dhe Inovacionit, Delina Ibrahimaj bëri të ditur sot nisjen e platformës së re elektronike të prokurimeve, prokurimet.obp.al, e cila synon digjitalizimin e plotë të administrimit të kërkesave për prokurim.

Sipas Ibrahimajt, përmes kësaj platforme më shumë se 250 autoritete kontraktore do të mund të administrojnë në mënyrë tërësisht digjitale kërkesat për prokurim, duke përfshirë përgatitjen, nënshkrimin dhe vulosjen elektronike të dokumentacionit.

Kjo mënyrë e re e administrimit eliminon nevojën për printimin dhe dorëzimin fizik të dokumenteve, duke synuar rritjen e shpejtësisë dhe efikasitetit në proceset e prokurimit.

Platforma e re sjell reduktim të dokumentacionit fizik dhe kostove administrative, komunikim të drejtpërdrejtë dhe të standardizuar ndërmjet institucioneve, si dhe mundësinë për ndjekjen në kohë reale të statusit të kërkesave.

Një tjetër element i rëndësishëm është rritja e transparencës dhe gjurmueshmërisë, pasi çdo veprim i kryer gjatë procesit mund të ndiqet në mënyrë të dokumentuar.

Sipas ministres, platforma përfaqëson një standard të ri bashkëpunimi ndërmjet autoriteteve kontraktore dhe Operatorit të Blerjeve të Përqendruara (OBP), duke ndryshuar mënyrën e paraqitjes dhe administrimit të kërkesave për prokurim.

“Prokurojmë së bashku për Shqipërinë evropiane”, shprehet Ibrahimaj, duke theksuar se digjitalizimi i këtij procesi synon të kursejë kohë dhe burime, të thjeshtojë procedurat dhe të mbështesë realizimin në kohë të prokurimeve për punë, mallra dhe shërbime.

Platforma e re synon gjithashtu të kontribuojë në ofrimin e shërbimeve më cilësore për qytetarët, përmes një administrimi më të shpejtë, transparent dhe efikas të procedurave të prokurimit publik.

/Marrë nga ATSH