Ministrja e Ekonomisë dhe Inovacionit, Delina Ibrahimaj, theksoi rëndësinë e rolit të Inspektoratit Qendror të Mbikëqyrjes së Tregut (IQMT) në garantimin e sigurisë së produkteve jo ushqimore dhe mbrojtjen e konsumatorëve.

Ibrahimaj u shpreh se çdo produkt, përfshirë edhe ato jo ushqimore që qytetarët zgjedhin dhe përdorin çdo ditë, duhet të jetë i sigurt dhe në përputhje me standardet ligjore.

Sipas saj, IQMT mbikëqyr tregun për të verifikuar përputhshmërinë e produkteve jo ushqimore, me synim mbrojtjen e konsumatorëve dhe nxitjen e një konkurrence të ndershme.

Ministrja bëri të ditur se institucioni planifikon dhe kryen inspektime pranë operatorëve ekonomikë, në bazë të programeve të miratuara nga organet kompetente.

Po ashtu, IQMT verifikon produktet e vendosura në treg duke kontrolluar dokumentacionin teknik dhe ligjor, etiketimin dhe informacionin për konsumatorin në fusha si siguria e produkteve jo ushqimore, ashensorët dhe pajisjet mekanike, pronësia industriale dhe e drejta e autorit, metrologjia dhe parapaketimet, etiketimi i konsumit të energjisë për pajisjet elektrike, si dhe fusha të tjera të përcaktuara me ligj.

Ibrahimaj nënvizoi se, kur gjatë kontrolleve konstatohen shkelje, IQMT ndërmerr masa administrative ndaj operatorëve ekonomikë, duke urdhëruar korrigjimin e tyre dhe, kur e parashikon ligji, ndalimin e tregtimit ose tërheqjen nga tregu të produkteve që nuk përmbushin standardet ligjore.

Sipas ministres, puna e IQMT-së kontribuon që në treg të qarkullojnë produkte më të sigurta, të mbrohen të drejtat e konsumatorëve dhe të respektohen rregullat e konkurrencës së ndershme.

Marrë nga ATSH