Ministri i Turizmit, Kulturës dhe Sportit, Blendi Gonxhja, bëri të ditur se Këshilli i Ministrave miratoi sot një vendim që disiplinon në nivel qendror pezullimin e punimeve të ndërtimit dhe aktiviteteve të lidhura me to në zonat turistike gjatë sezonit veror.

Sipas ministrit, vendimi synon të garantojë një sezon turistik me standarde më të larta për vizitorët, duke shmangur shqetësimet që shkaktojnë punimet në zonat bregdetare dhe destinacionet turistike.

Gonxhja u ndal edhe te ndryshimet ligjore që synojnë lehtësimin e procedurave në sektorin e turizmit, duke përmendur regjistrimin elektronik të vizitorëve, certifikimin, si dhe rregulla të reja për trajtimin e mbetjeve organike nga hotelet dhe restorantet.

Mbetjet organike të hoteleve e restoranteve do të trajtohen tashmë në një mënyrë të re.

“Nuk mund të merren dhe të hidhen në çdo orë të ditës në koshat e lagjes apo në koshat e mbeturinave të komunitetit”, tha ministri, pasi ato do të menaxhohen sipas një regjimi dhe protokolli të veçantë, të përcaktuar tashmë në ligj. Ai theksoi se qëllimi i qeverisë është zhvillimi i një turizmi më cilësor, që gjeneron më shumë të ardhura për ekonominë.

“Ne duam një turizëm që, pse jo, të jetë edhe me më pak miliona vizitorë, por që të jetë një turizëm cilësor, i cili lë më shumë para në ekonominë tonë dhe më shumë mirëqenie”, u shpreh Gonxhja.

Burimi ATSH