Ministri i Drejtësisë, Toni Gogu, theksoi sot se raporti i sundimit të ligjit 2026 i Komisionit Evropian konfirmon rezultatet e reformës në drejtësi dhe progresin e arritur në funksionimin e sistemit.

Sipas Gogut, raporti vlerëson përfundimin e procesit të rivlerësimit kalimtar (vetting), rezultatet në luftën kundër korrupsionit, forcimin e integritetit, transparencës dhe llogaridhënies në sistemin e drejtësisë, si edhe përmirësimin e eficiencës së sistemit gjyqësor dhe avancimin e përafrimit të Shqipërisë me standardet e Bashkimit Evropian.

“Reforma në drejtësi po jep rezultate. Raporti i Sundimit të Ligjit 2026 i Komisionit Evropian vlerëson përfundimin e procesit të rivlerësimit kalimtar, rezultatet në luftën kundër korrupsionit, forcimin e integritetit, transparencës dhe llogaridhënies në sistemin e drejtësisë, përmirësimin e eficiencës së sistemit gjyqësor dhe avancimin e përafrimit të Shqipërisë me standardet e Bashkimit Evropian”, shkruan Gogu.

Ministri theksoi se raporti evidenton edhe sfidat që mbeten për t’u adresuar, mes të cilave rritja e mëtejshme e eficiencës së sistemit gjyqësor, plotësimi i kapaciteteve njerëzore, përfundimi i digjitalizimit të drejtësisë, forcimi i konsultimit publik dhe vijimi i masave për parandalimin dhe luftën kundër korrupsionit.

“Çdo vlerësim pozitiv është një nxitje për të ecur përpara, ndërsa çdo rekomandim është një mundësi për t’u përmirësuar. Kështu ndërtohet një drejtësi më e fortë dhe kështu afrohet Shqipëria çdo ditë më shumë me Bashkimin Evropian”, shkruan Gogu.

Burimi ATSH