Industria audiovizuale shqiptare po ndërmerr një hap të rëndësishëm drejt integrimit në tregun ndërkombëtar.

Ministri i Turizmit, Kulturës dhe Sportit, Blendi Gonxhja, tha se, Shqipëria po avancon drejt miratimit të Konventës së Këshillit të Evropës për Bashkëprodhimin e Veprave Audiovizuale në Formën e Serialeve, një instrument që synon të krijojë një kuadër të përbashkët ligjor për bashkëpunime më të sigurta dhe më të barabarta mes producentëve shqiptarë dhe partnerëve evropianë.

Miratimi i kësaj Konvente pritet të sjellë mundësi të reja për sektorin krijues në vend, duke i hapur rrugën realizimit të serialeve televizive në bashkëpunim me kompani evropiane, mbi rregulla të unifikuara dhe standarde ndërkombëtare.

Për producentët shqiptarë, kjo do të thotë më shumë mundësi për partneritete me industrinë audiovizuale jashtë vendit, ndërsa profesionistët vendas, nga skenaristët dhe regjisorët te aktorët dhe ekipet teknike, do të kenë më shumë hapësira për t’u përfshirë në projekte me shtrirje ndërkombëtare.

Konventa krijon gjithashtu kushte më të favorshme për qarkullimin dhe shpërndarjen e prodhimeve shqiptare në tregjet evropiane dhe më gjerë, duke forcuar pozicionin e Shqipërisë në industrinë kreative.

Ky zhvillim vjen në një moment kur Qendra Kombëtare e Kinematografisë pritet të hapë skema të reja financimi edhe për serialet televizive. Kombinimi i mbështetjes financiare me sigurinë ligjore që ofron konventa përbën një bazë të rëndësishme për krijimin e projekteve të reja audiovizuale dhe për rritjen e industrisë së filmit e televizionit në Shqipëri.

Burimi ATSH