Përfaqësues të UEFA-s kanë zhvilluar vizitën e radhës në Shqipëri në kuadër të përgatitjeve për finalet e Kampionatit Europian U-21 2027, ku vendi ynë do të jetë një nga dy organizatorët e këtij kompeticioni prestigjioz.

Gjatë katër ditëve të inspektimeve, ekspertët e UEFA-s kanë vizituar stadiumet që do të presin ndeshjet e turneut, duke u fokusuar në aspektet teknike dhe operacionale të organizimit.

Në qendër të vëmendjes kanë qenë sistemet e ndriçimit, gjeneratorët rezervë, masat e sigurisë dhe elementë të tjerë të rëndësishëm që lidhen me standardet e kërkuara nga UEFA për zhvillimin e ndeshjeve ndërkombëtare.

Vizita nisi me inspektimin e stadiumit “Loro Boriçi” në Shkodër, ndërsa më pas delegacioni u ndal në “Elbasan Arena”.

Në ditën e tretë të axhendës, përfaqësuesit e UEFA-s zhvilluan vizita në stadiumin “Air Albania” dhe në “Arena e Demave”, dy impiante ku aktualisht po kryhen investime të rëndësishme infrastrukturore në funksion të EURO U-21 2027.

Gjatë qëndrimit në Tiranë, delegacioni u njoh nga afër me ecurinë e punimeve në stadiumin “Air Albania”, ku po realizohet përmirësimi i bazamentit të fushës dhe vendosja e një tapeti të ri me bar hibrid, sipas standardeve më të larta të UEFA-s.

Po ashtu, përfaqësuesit e UEFA-s panë nga afër edhe punimet që po zhvillohen në “Arena e Demave”, ku ka nisur procesi i zëvendësimit të tapetit artificial me bar natyral.

Ky investim përfshin heqjen e sipërfaqes ekzistuese, instalimin e sistemit të vaditjes dhe krijimin e një terreni të ri loje, që do të përmbushë kërkesat për organizimin e ndeshjeve ndërkombëtare.

Vizita e radhës konfirmon bashkëpunimin e ngushtë mes FSHF-së dhe UEFA-s në kuadër të organizimit të finaleve të Kampionatit Europian U-21 2027.

Federata e Futbollit vijon të punojë për përmbushjen e të gjitha standardeve organizative dhe infrastrukturore, me synimin që Shqipëria të presë me sukses një nga eventet më të rëndësishme të futbollit europian për të rinj.

Burimi ATSH