Kryetari i Kuvendit, Niko Peleshi zhvilloi një takim me kryetaren e Komisionit për Çështjet e Jashtme të Parlamentit të Letonisë, Inara Murniece, si dhe me kryetarin e Komisionit për Çështjet e Bashkimit Europian, Edmunds Cepurītis.

Peleshi bëri me dije se në fokus të takimit ishte “procesi i anëtarësimit të Shqipërisë në Bashkimin Europian, mbështetja parlamentare dhe publike në shtetet anëtare, si dhe forcimi i diplomacisë parlamentare në funksion të avancimit të mëtejshëm të procesit të zgjerimit”.

Peleshi shprehu vlerësimin për mbështetjen e vazhdueshme që Letonia i ka dhënë integrimit europian të Shqipërisë, duke e konsideruar atë një zë të rëndësishëm në mbështetje të perspektivës europiane të vendeve të Ballkani Perëndimor.

“Shqipëria mbetet e përkushtuar për të vijuar reformat dhe për të përmbushur me sukses rrugëtimin drejt anëtarësimit të plotë në Bashkimin Europian”, tha Peleshi.

Marrë nga ATSH