Ministri i Turizmit, Kulturës dhe Sportit, Blendi Gonxhja e cilësoi FIP Platinum Albania një sukses të jashtëzakonshëm sportiv dhe organizativ, duke theksuar se turneu e vendosi Shqipërinë në hartën e eventeve më të rëndësishme ndërkombëtare të padelit.

Në një reagim pas përfundimit të turneut, Gonxhja vlerësoi pjesëmarrjen e lartë të publikut dhe nivelin e garës, që kulmoi me finalet e zhvilluara në sheshin “Skënderbej”.

“Një maratonë ndeshjesh që nisi më 26 maj, kulmoi mbrëmë në sheshin “Skënderbej” me finalet e mëdha të FIP Platinum Albania, duke mbyllur një javë të paharrueshme jo vetëm për padelin, por për të gjithë sportin në tërësi”, u shpreh ministri.

Sipas tij, gjatë pesë ditëve të aktivitetit, rreth 20 mijë spektatorë ndoqën nga afër emocionet e garave, ku morën pjesë 150 sportistë nga vende të ndryshme të botës dhe disa prej emrave më të njohur të renditjes ndërkombëtare.

Në kategorinë e meshkujve, titulli u fitua nga Franco Stupaczuk dhe Mike Yanguas, të cilët mposhtën në finale David Gala dhe Enzo Jensen, ndërsa te femrat triumfuan Marina Guinart dhe Veronica Virseda ndaj Ale Salazar dhe Ale Alonso.

Gonxhja theksoi se organizimi i këtij eventi dëshmoi kapacitetet e Shqipërisë për të pritur gara të nivelit më të lartë ndërkombëtar.

“Tirana u shndërrua në një skenë të denjë për sportin elitar, duke dëshmuar se Shqipëria ka kapacitetet, energjinë dhe vizionin për të organizuar me sukses ngjarje sportive të nivelit më të lartë ndërkombëtar”, deklaroi ai.

Ministri nënvizoi se turneu pati ndikim të rëndësishëm edhe në promovimin e vendit si destinacion turistik dhe sportiv.

“Ky turne ishte shumë më tepër se një garë sportive; ishte një mundësi e shkëlqyer për promovimin e vendit tonë, për forcimin e imazhit të Shqipërisë si destinacion turistik e sportiv dhe për të afruar mijëra të rinj me vlerat që përcjell sporti”, tha Gonxhja.

Duke vlerësuar mbështetjen institucionale për realizimin e aktivitetit, ai u shpreh se organizimi i FIP Platinum Albania përbën një moment të rëndësishëm për sportin shqiptar.

“Jam shumë i lumtur dhe i privilegjuar që gjatë mandatit tim si Ministër i Turizmit, Kulturës dhe Sportit, falë mbështetjes së Kryeministrit të Shqipërisë Edi Rama dhe qeverisë shqiptare, arritëm të organizonim një aktivitet të këtyre përmasave, që e vendosi Shqipërinë në hartën e eventeve më të rëndësishme ndërkombëtare të padelit dhe që do të mbetet një moment i rëndësishëm në historinë e sportit shqiptar”, deklaroi ministri.

Në përfundim, Gonxhja shprehu mirënjohje për të gjithë organizatorët dhe partnerët që kontribuuan në suksesin e turneut.

“Faleminderit FIP, Federatës Shqiptare të Padelit dhe çdo mbështetësi e bashkëpunëtori”, përfundoi ai.

Burimi ATSH