Ministri për Evropën dhe Punët e Jashtme, Ferit Hoxha, reagoi sot pas sulmit të fundit rus ndaj Ukrainës, ku është goditur edhe kompleksi rezidencial në Kiev ku banon ambasadori shqiptar.

Përmes një postimi në rrjetin social X, Hoxha e cilësoi sulmin si një shpërfillje totale ndaj jetës dhe dinjitetit njerëzor. Sipas ministrit, gjatë sulmit është goditur kompleksi ku jeton ambasadori shqiptar në Ukrainë, duke i rrezikuar seriozisht jetën.

“Shqipëria dënon me forcë një tjetër sulm brutal në shkallë të gjerë me raketa balistike dhe dronë të nisur mbrëmjen e fundit nga Rusia ndaj objektivave civile në Ukrainë, në një shpërfillje totale të jetës dhe dinjitetit njerëzor.

“Këtë herë u godit kompleksi rezidencial ku banon Ambasadori i Shqipërisë në Ukrainë, duke e vënë jetën e tij në rrezik serioz. Kjo është e papranueshme”, shkruan Hoxha.

Ministri shtoi se sulmet ndaj zonave civile janë një tjetër kujtesë e zymtë e kostos njerëzore të agresionit rus, ndërsa theksoi se Rusia prej më shumë se katër vitesh ka goditur vazhdimisht infrastrukturën energjetike, shkollat, spitalet dhe banesat në të gjithë Ukrainën.

“Targetimi i zonave civile dhe vënia në rrezik e personelit diplomatik përfaqëson një përshkallëzim të rëndë dhe një tjetër kujtesë të zymtë të kostos njerëzore të agresionit të vazhdueshëm të Rusisë.

“Kjo luftë e zgjedhur nga Rusia ka zgjatur shumë gjatë. Për më shumë se katër vjet që nga pushtimi i paligjshëm në shkallë të gjerë, Rusia ka targetuar pa pushim infrastrukturën energjetike, shkollat, spitalet dhe shtëpitë në të gjithë Ukrainën. Megjithatë, ajo nuk ka arritur të thyejë guximin, vendosmërinë, qëndrueshmërinë dhe forcën e popullit ukrainas. Rusia nuk po fiton; ajo vetëm po vret, po nxit vuajtje dhe shkatërrim”, theksoi Hoxha.

Në reagimin e tij, Hoxha i bëri thirrje Rusisë “që të ndërpresë menjëherë këto sulme, t’i japë fund luftës kundër Ukrainës, të respektojë plotësisht ligjin ndërkombëtar dhe të kthehet në negociata”.

Ai rikonfirmoi gjithashtu mbështetjen e Shqipërisë për sovranitetin, pavarësinë dhe integritetin territorial të Ukrainës.

“Shqipëria do të vazhdojë të qëndrojë fort pranë Ukrainës dhe përsërit mbështetjen e saj të palëkundur për sovranitetin, pavarësinë dhe integritetin territorial të Ukrainës. Ata që janë përgjegjës për këto sulme duhet të mbahen përgjegjës”, tha ai,

Hoxha shtoi se “ambasadori i Federatës Ruse në Shqipëri është thirrur për shpjegime”.

Burimi ATSH