Presidenti Bajram Begaj pranoi sot Letrat Kredenciale të ambasadorit të Kuvajtit në Shqipëri, Mohsen Alajmi.

Kreu i Shtetit i uroi ambasadorit Alajmi mirëseardhjen në Tiranë duke shprehur besimin në forcimin e mëtejshëm të marrëdhënieve mes dy vendeve.

Në fillim të këtij takimi, Begaj rikonfirmoi solidaritetin e Shqipërisë me Kuvajtin përballë sulmeve të Iranit, duke i cilësuar ato si një shkelje të hapur të sovranitetit të shtetit dhe të së drejtës ndërkombëtare, ndërsa vlerësoi mbështetjen për qytetarët shqiptarë në Kuvajt.

Në lidhje me marrëdhëniet dypalëshe, Presidenti Begaj vuri në dukje se ato janë të nivelit shumë të mirë, teksa përmendi projekte të Shtetit të Kuvajtit në Shqipëri, si në sferën humanitare ashtu edhe në fushën e zhvillimit.

Në vlerësimin e Presidentit Begaj, këto nisma të përbashkëta duhet të vazhdojnë, ndaj dhe në takim u vlerësua interesi i intensifikimit të vizitave të ndërsjella për rritjen e bashkëpunimit.

Shqipëria, theksoi Kreu i Shtetit, inkurajon sipërmarrësit kuvajtianë të përdorin lehtësitë e krijuara nga institucionet shqiptare për të investuar në fusha me interes strategjik.

Në këtë aspekt u shpreh gatishmëria për të thirrur Sesionin e Komisionit të Përbashkët Ndërqeveritar për Bashkëpunim Ekonomik.

Gjatë takimit, krahas marrëdhënieve dypalëshe, u vlerësua mbështetja e Kuvajtit për Kosovën si dhe bashkëpunimi në arenën ndërkombëtare, veçanërisht për kandidaturat përkatëse në organizmat e OKB-së.

Burimi ATSH