Kryeministri Edi Rama siguroi sot se do të shtohet numri i mësuesve të gjuhës shqipe në diasporë dhe qeveria do të vazhdojë të sponsorizojë me buxhetin e shtetit këtë punë fantastike.

E ftuara e radhës e kryeministrit Rama në podkastin “Flasim” ishte Drita Gjongecaj, mësuese e gjuhës shqipe në Nju Jork.

Ndërsa i cilësoi mësueset e gjuhës shqipe në diasporë “Heroinat e heshtura të shqiptarisë”, Rama siguroi se programi “Mësues për Shqipërinë” do të fuqizohet vit pas viti me degët mësues për Greqinë dhe mësues për Italinë.

Ndërsa Gjongecaj u ndal te përpjekjet që ka bërë për të nxitur mësimin e gjuhës shqipe te fëmijët me origjinë shqiptare në Nju Jork.

Ajo renditi si sukses në këtë drejtim hapjen për herë të parë në Bronks të klasës dygjuhëshe (shqip-anglisht).

“Përtej klasa bilinguale, kjo është gjithëpërfshirëse. Kemi një klasë shqipe të hapur në shkollë publike amerikane. Mësimi shqip tani nuk kufizohet vetëm me anën gjuhësore por përfshin të gjitha lëndët”, sqaroi ajo.

Sipas saj, ka një interes përtej parashikimeve nga prindërit shqiptarë në SHBA për krijimin e klasave të tilla. Një nga mënyrat si mund të ndihmojë shteti shqiptar, sipas Gjongecaj, është hartimi i materialeve shtesë për këto klasa.

Kryeministri Rama siguroi se do të shikojë mundësinë për të siguruar një takim të mësuesve shqiptarë në Nju Jork me kryetarin e ri të Bashkisë së Nju Jorkut.

Burimi ATSH