Me vendim të Këshillit të Ministrave, Parku Arkeologjik i Orikumit u deklarua javën e kaluar “Pasuri kulturore e paluajtshme”. Përmes këtij vendimi, është miratuar zonifikimi dhe plani për ruajtjen, mbrojtjen dhe administrimin e tij.

Ministri i Turizmit, Kulturës dhe Sportit, Blendi Gonxhja, tha se ky vendim forcon kuadrin ligjor dhe institucional për administrimin e një prej siteve më të rëndësishme arkeologjike në vend, duke garantuar ruajtjen e vlerave historike, duke e trajtuar atë si një njësi të pavarur menaxhimi dhe duke garantuar një qasje më të specializuar për ruajtjen, studimin dhe promovimin e tij.

Në thelb të këtij projektvendimi qëndron miratimi i zonifikimit të parkut në dy zona kryesore, Zona A dhe Zona B, të cilat përcaktojnë nivele të ndryshme mbrojtjeje dhe ndërhyrjeje.

Ministri Gonxhja shpjegon se, Zona A përfshin bërthamën e qytetit antik dhe gëzon nivelin më të lartë të mbrojtjes, ku lejohen vetëm ndërhyrje konservuese, restauruese dhe kërkime shkencore. Ndërsa Zona B përfshin hapësirat përreth me potencial arkeologjik, ku ndërhyrjet zhvillimore mund të realizohen vetëm në mënyrë të kontrolluar dhe pas vlerësimeve përkatëse.

Ministri u shpreh se, ky zonifikim krijon një ekuilibër të qëndrueshëm të mbrojtjes së trashëgimisë kulturore.

Njëkohësisht me Parkun Arkeologjik të Orikumit, me vendim të Këshillit të Ministrave, një zonë në qytetin e Delvinës është deklaruar pasuri kulturore e paluajtshme “ansambël arkitektonik urban”.

Burimi ATSH