Ministri i Shtetit për Pushtetin Vendor, Ervin Demo solli sot në vëmendje projektin e financuar nga Emiratet e Bashkuara Arabe, një grant i cili do të fokusohet në fuqizimin e logjistikës të bashkive për përballimin e situatave emergjente.

Bashkë me kryeministrin Edi Rama, ministri Demo ishte i pranishëm në një takim me disa banorë të prekur nga shembja e rrugës Librazhd-Përrenjas.

Demo sqaroi se kjo zonë ka pasur problematika në rrëshqitje edhe në akset dytësore ku kryetarët e bashkive kanë bërë një punë të jashtëzakonshme për të qenë pranë qytetarëve.

“Roli i bashkive në këtë kontekst është shumë i rëndësishëm, jo thjesht për sa i përket mirëmbajtjes së infrastrukturës, por mbi të gjitha në të njëjtën kohë dhe informimin e qytetarëve, sidomos kur flasim për avari të kësaj natyre të cilat janë për shkak të kushteve madhore”, tha Demo.

Ai vlerësoi reagimin që kanë pasur kryetarët e bashkive që janë prekur nga situatat e vështira të krijuara nga moti i keq.

“Këto janë situata ku ne duhet të bëhemi bashkë dhe kryetarët e bashkive këtë e kuptojnë më së miri, të qenit pranë komunitetit. Planifikimi që vetë bashkitë do të bëjnë dhe përgatitjet për sa i përket vitit të mëpasshëm dhe në njëfarë mënyre edhe parashikimin deri diku për parandalimin e këtyre fenomeneve do të jetë në fokusin e punës sonë”, theksoi ai.

Demo solli në vëmendje alokimin e fondit të ardhur nga Emiratet e Bashkuara, një grant i cili do të fokusohet në fuqizimin e logjistikës që bashkitë kanë në dispozicion për përballimin e situatave të tilla.

“Në tërësi projekti parashikon krijimin e kushteve që fenomenet si përmbytjet, t’i kemi në minimizim në mënyrë progresive. Por në të njëjtën kohë parashikon dhe përballimin e këtyre situatave me logjistikën e duhur nga të gjitha bashkitë në nivel kombëtar. Moti është bërë shumë herë më i paparashikueshëm dhe situata të tilla dhe fenomene të tilla me probabilitet shumë të lartë, do të kenë dhe intensitet më të lartë me kalimin e viteve”, shtoi ai.

/Marrë nga ATSH