Ministri i Shtetit për Pushtetin Vendor, Ervin Demo deklaroi sot në një intervistë televizive se marrëdhëniet mes Shqipërisë dhe Shteteve të Bashkuara të Amerikës janë të shkëlqyera dhe partneriteti strategjik mes dy vendeve mbetet i konsoliduar.

Duke folur për mbledhjen e Bordit të Paqes në Uashnigton, ku shoqëroi kryeministrin Edi Rama, Demo vuri në dukje rolin e Shqipërisë si një faktor stabiliteti dhe dialogu në rajon, veçanërisht në një kontekst ndërkombëtar të ndërlikuar.

“Shqipëria ka një pozicion miqësor me të gjitha palët në Lindjen e Mesme dhe besoj që kjo e bën akoma dhe më të veçantë rolin e Shqipërisë në Bordin e Paqes, duke treguar me vetë prezencën e saj që marrëdhëniet, qoftë bilaterale apo më gjerë, nuk mund të kushtëzohen nga kampe të caktuara”, tha Demo.

I pyetur mbi qëndrimet skeptike të opozitës lidhur me marrëdhëniet mes Tiranës dhe Uashingtonit, Demo u shpreh se raportet mes dy vendeve janë të konsoliduara dhe në rritje.

“Nuk diskutohet që marrëdhëniet e Shqipërisë me Shtetet e Bashkuara janë të shkëlqyera. Partneriteti strategjik midis dy vendeve tona është i padiskutueshëm dhe prezenca e Shqipërisë në Bordin e Paqes është dëshmi e kësaj marrëdhënieje kaq të vlefshme”, deklaroi ai.

Demo shtoi se marrëdhëniet mes dy vendeve janë ndërtuar mbi baza të qëndrueshme dhe se ato do të forcohen më tej vit pas viti.

/Marrë nga ATSH