Ministri për Evropën dhe Punët e Jashtme, Ferit Hoxha ka reaguar pas rezolutës së miratuar sot nga Parlamenti Evropian mbi gjetjet dhe rekomandimet e Komitetit të Posaçëm për Mburojën Evropiane të Demokracisë, e cila njeh se Ballkani Perëndimor është në vijën e parë të manipulimit dhe ndërhyrjes së huaj të informacionit (FIMI).

Ministri Hoxha, në reagimin e tij, thekson se Shqipëria mirëpret rezolutën e miratuar nga Parlamenti Evropian.

“Mesazhi i Parlamentit Evropian është i qartë: forcimi i qëndrueshmërisë demokratike në vendet kandidate do të thotë forcimi i vetë Evropës.

Kjo përputhet plotësisht me diskutimet që zhvilluam në Shqipëri korrikun e kaluar, në konferencën tonë për FIMI-n, e cila mblodhi së bashku vendet partnere, institucionet evropiane, ekspertë, median dhe shoqërinë civile për të trajtuar sfidat në rritje të paraqitura nga dezinformimi, kërcënimet hibride, ndikimi keqdashës dhe keqpërdorimi i teknologjive të reja”, shkruan Hoxha.

Sipas tij, “mesazhi thelbësor i Konferencës në Tiranë mbetet po aq i rëndësishëm sot sa ishte atëherë: qëndrueshmëria demokratike nuk është më vetëm një çështje kombëtare; ajo është një pjesë thelbësore e sigurisë kolektive të Evropës”.

Hoxha vijon më tej duke shtuar se “përfundimi i Parlamentit Evropian se qëndrueshmëria ndaj FIMI-t duhet të forcohet në të gjithë hapësirën evropiane, përfshirë vendet kandidate, është për këtë arsye i drejtë, në kohën e duhur dhe i mirëpritur. Qëndrueshmëria demokratike e Evropës mund të jetë vetëm aq e fortë, sa hallka e saj më e dobët”.

“Shqipëria është e gatshme të punojë sa më ngushtë të jetë e mundur me partnerët tanë evropianë dhe të bashkojë forcat në përpjekjen e përbashkët për të forcuar qëndrueshmërinë demokratike të Evropës dhe për të mbrojtur hapësirën tonë të përbashkët demokratike”, përfundon Hoxha reagimin e tij.

Burimi ATSH