Kryeministri Edi Rama përgëzoi një ditë më parë homologen e tij italiane, Giorgia Meloni, e cila shënoi një rekord historik në drejtimin e qeverisë italiane.

Rama e uroi Melonin për mandatin më jetëgjatë në historinë e Republikës Italiane, ndërsa në mesazhin e tij nuk munguan batutat për politikën italiane, gratë në pushtet dhe marrëdhëniet me Evropën.

Kryeministrja italiane iu përgjigj përmes një mesazhi urimit të kryeministrit, ku shkruan se Shqipëria është një mike dhe një partnere e çmuar.

Kryeministrja italiane shprehet se është e kënaqur që kryeministri Rama, pas ndryshimeve të shumta të qeverive dhe drejtuesve në Itali, ka krijuar tashmë një raport më të afërt me qeverinë aktuale.

“Edi, miku im, faleminderit nga zemra për këtë videomesazh. Si gjithmonë, arrin të ndërthurësh ironinë me disa të vërteta jo fort të rehatshme! Më vjen mirë të di që, pas kaq shumë ndryshimeve të bashkëbiseduesve në Romë, më në fund ke pasur mundësinë të krijosh pak më shumë afeksion për atë aktualin. Ndërrimi i shpeshtë i stolit nuk ndihmon kurrë për të ndërtuar diçka solide. Por në fund, kur gjen ekipin e duhur, është më e lehtë të luash mirë dhe të marrësh rezultate”, shkruan ajo.

Meloni nënvizon gjithashtu marrëdhënien e konsoliduar mes Shqipërisë dhe Italisë, duke vlerësuar bashkëpunimin dypalësh gjatë viteve të fundit.

“Gjatë këtyre viteve kemi ndarë një marrëdhënie të sinqertë dhe bashkëpunim konkret që ka forcuar gjithnjë e më shumë lidhjen mes dy vendeve tona. Shqipëria është një mike dhe një partnere e çmuar, dhe jam krenare për rrugëtimin që po bëjmë së bashku edhe në kuadër të Evropës. Një përqafim të përzemërt dhe shihemi së shpejti!”, shkruan Meloni.

Marrë nga ATSH