Prindërit shqiptarë që jetojnë jashtë vendit mund të regjistrojnë fëmijët e tyre në shkollat dhe kurset e gjuhës shqipe në diasporë.

Ministrja e Arsimit Mirela Kumbaro informoi sot se regjistrimet për vitin e ri arsimor janë hapur.

Kumbaro theksoi se mësimi i gjuhës shqipe organizohet në shumë vende të botës, duke u ofruar fëmijëve mundësinë të ruajnë dhe të zhvillojnë njohuritë e gjuhës amtare, si dhe të forcojnë lidhjen me kulturën dhe traditat shqiptare.

Shkollat dhe kurset e gjuhës shqipe në diasporë janë të pranishme në 22 vende të botës, duke u ofruar fëmijëve shqiptarë mundësinë të mësojnë dhe të ruajnë gjuhën amtare.

Programet zhvillohen në Angli, Greqi, Gjermani, Slloveni, Australi, Irlandë, Spanjë, Austri, Itali, Suedi, Belgjikë, Kanada, Turqi, Danimarkë, Kroaci, Ukrainë, Finlandë, Luksemburg, SHBA, Francë, Norvegji dhe Zvicër, duke krijuar hapësira për ruajtjen dhe përcjelljen e gjuhës, kulturës dhe identitetit shqiptar te brezat e rinj të diasporës.

Burimi ATSH