Shkodra, djepi i kulturës, artit dhe traditës shqiptare në veri të vendit, vijon të mbetet një nga zonat më të frekuentuara nga qytetarët, vizitorët dhe turistët, këtë sezon veror.

Kryeministri Edi Rama ndau në rrjetet sociale pamje nga mbrëmja në qytet, ku pedonalja në qendër të qytetit paraqitet e mbushur me njerëz dhe e ndriçuar, ndërsa perëndimi i diellit këtë të premte, ka krijuar një panoramë spektakolare me ngjyra mbi qytet.

Pamjet e publikuara nga Rama tregojnë atmosferën e mbrëmjes në pedonalen e Shkodrës, e ndriçuar dhe e gjallëruar nga prania e qytetarëve dhe vizitorëve.

Pedonalja në qendër të qytetit përbën një nga hapësirat karakteristike të Shkodrës, ku ndërthurja e arkitekturës tradicionale me ndërhyrjet e restaurimit urban i jep zonës një pamje të veçantë.

Në hyrje të pedonales ndodhet edhe Muzeu Kombëtar i Fotografisë “Marubi”, një prej institucioneve më të rëndësishme të trashëgimisë fotografike shqiptare.

Gjatë mbrëmjes, pedonalja frekuentohet nga qytetarë dhe turistë, ndërsa lokalet dhe njësitë tregtare përgjatë saj ofrojnë gatime tradicionale dhe produkte të ndryshme.

Pamjet e ndara nga kryeministri Rama përcjellin gjithashtu perëndimin e diellit mbi qytet, me qiellin e ngjyrosur në tone të kuqërremta, duke krijuar një atmosferë të veçantë mbrëmjeje në Shkodër.

Burimi ATSH