Në shkurt të vitit 2021, Kina shpalli eliminimin e varfërisë ekstreme në nivel kombëtar. Në Konferencën Kombëtare të Zhvillimit dhe Lehtësimit të Varfërisë, të mbajtur për të shënuar këtë arritje, Presidenti Xi Jinping e përshkroi eliminimin e varfërisë ekstreme si një hap të rëndësishëm drejt prosperitetit të përbashkët. Në vitin 2022, në Forumin Ekonomik Botëror, ai theksoi gjithashtu se prosperiteti i përbashkët synon të përfshijë të gjithë, por nuk nënkupton barazim absolut të të ardhurave. Modeli kinez i prosperitetit të përbashkët pranon ekzistencën e diferencave në të ardhura dhe zhvillim, por synon që këto diferenca të shoqërohen me një nivel të përgjithshëm më të lartë mirëqenieje dhe mundësi më të mëdha për të gjithë.
Zhejiang-u si zonë eksperimentale
Për të përshpejtuar zbatimin e kësaj qasjeje, në vitin 2021 provinca Zhejiang u përzgjodh si zonë demonstrimi për prosperitetin e përbashkët. Zhejiang-u është një nga provincat më të vogla të Kinës për nga sipërfaqja, por njëkohësisht ndër më të pasurat. Të ardhurat e disponueshme për frymë janë ndër më të lartat në Kinë, pas Shangait dhe Pekinit, ndërsa diferenca e të ardhurave midis zonave urbane dhe rurale ishte ndër më të ulëtat në vend.
Për këtë arsye, janë përcaktuar një sërë objektivash konkretë. Në përgjithësi, objektivat e provincës janë përqendruar në disa drejtime kryesore: zgjerimin e ekonomisë, ngushtimin e diferencave të të ardhurave, barazimin e aksesit në shërbimet publike, përmbushjen e nevojave kulturore dhe shpirtërore të njerëzve dhe mbrojtjen e mjedisit. Në këtë kuadër, Zhejiang-u synon të arrijë përparim vendimtar në promovimin e zhvillimit me cilësi të lartë dhe në ndërtimin e “Zonës Demonstruese për Prosperitetin e Përbashkët”, duke shërbyer si një model për bashkërendimin e rritjes ekonomike dhe përmirësimit të standardit të jetesës.
Një mjek ofron shërmbime falas për banorët ruralë, fshat Lingxi, qytet Taizhou, provincë Zhejiang, 2024/ Foto nga VCG
Në qershor 2021, u publikuan “Mendimet e Komitetit Qendror të PKK-së dhe Këshillit Shtetëror mbi Mbështetjen e Zhvillimit me Cilësi të Lartë të Zhejiang-ut dhe Ndërtimin e një Zone Demonstruese të Prosperitetit të Përbashkët”. Si një provincë e madhe ekonomike bregdetare dhe një përfaqësuese e atyre që “u pasuruan të parët”, Zhejiang-ut iu besua misioni i rëndësishëm i eksplorimit të zhvillimit me cilësi të lartë dhe ndërtimit të një zone demonstruese të prosperitetit të përbashkët.
Gjatë pesë viteve të fundit, janë bërë përparime të konsiderueshme dhe të qëndrueshme në ndërtimin e zonës së saj demonstruese. PBB-ja për frymë është rritur nga 105 000 juanë në vitin 2020 në afërsisht 140 000 juanë në vitin 2025. Të ardhurat e disponueshme për frymë për banorët urbanë dhe ruralë kanë tejkaluar përkatësisht 80 000 juanë dhe 45 000 juanë, duke u renditur e para midis të gjitha provincave dhe rajoneve.
Për të arritur të gjitha pritshmëritë, do të zbatohet më tej strategjia e punësimit, duke promovuar punësim me cilësi të lartë dhe të plotë, duke thelluar ndërtimin e një shoqërie të bazuar në aftësi në nivel provincial dhe duke zbatuar plane për rritjen e të ardhurave të banorëve urbanë dhe ruralë.
Një nga aspektet për t’u vlerësuar është fakti se për të lehtësuar vështirësitë me të cilat përballen njerëzit në zonat e largëta në aksesin për kujdesin mjekësor, Provinca Zhejiang ka ndërtuar në mënyrë inovative një sistem mjekësor të lëvizshëm inteligjent, duke mundësuar takime online për konsulta në distancë dhe akses online në të dhënat shëndetësore. Deri më tani, Provinca Zhejiang ka vendosur 508 automjete shërbimi mjekësor dhe ka krijuar 1 510 pika shërbimi mjekësor të lëvizshëm.
Integrimi i shërbimeve publike bazë – kujdesi mjekësor, arsimi dhe kujdesi për të moshuarit – po bëhet një strategji kyçe për të promovuar prosperitetin e përbashkët. Tashmë mbi 12 000 pika ndihme për të moshuarit i shërbejnë publikut.
Gjatë periudhës së Planit të 15-të Pesëvjeçar (2026-2030), Zhejiang-u do të vazhdojë të promovojë përmirësimin e cilësisë dhe efikasitetit të shërbimeve publike bazë, duke u lejuar njerëzve të ndajnë një jetë me cilësi të lartë. Të dhënat tregojnë se zhvillimi me cilësi të lartë dhe ndërtimi i një zone demonstruese për prosperitet të përbashkët po përparojnë vazhdimisht. Nga 101 standardet bazë të shërbimit publik në nivel provincial, 96 nuk kanë më dallime urbane-rural, dhe hendeku i të ardhurave urbane-rural po ngushtohet nga 1,96 në afërsisht 1,81.
Një banore rurale punon në fabrikë afër shtëpisë, fshat Shuige, provincë Zhejiang, 2026/Foto nga VCG
Në shtator 2023, gjatë turit të tij inspektues në Zhejiang, Presidenti Xi Jinping theksoi: “Zhejiang-u duhet të marrë drejtimin në promovimin e prosperitetit të përbashkët. Ne duhet të avancojmë ngushtimin e hendekut urban-rural, dhe të përmirësojmë më tej sistemin dhe mekanizmin për zhvillimin e integruar midis tyre.” Skica e Planit të 15-të Pesëvjeçar propozon të ndërmerren hapa të fortë drejt promovimit të zhvillimit të gjithanshëm për të gjithë njerëzit.
Me sytë dhe objektivat nga e ardhmja
Në vitin 2026, Zhejiang-u publikoi planin për promovimin e prosperitetit të përbashkët, duke vendosur si objektiv arritjen e “përparimit vendimtar” deri në vitin 2030. Si një provincë që luan rol pionier në eksplorimin e rrugës drejt prosperitetit të përbashkët, lidershipi synon ta çojë më tej këtë proces përmes zhvillimit me cilësi të lartë dhe përmirësimit të mirëqenies së banorëve. PBB-ja për frymë, së bashku me të ardhurat e banorëve urbanë dhe ruralë, pritet t’i afrohet nivelit të ekonomive të zhvilluara.
Zhejiang-u nuk e sheh prosperitetin e përbashkët vetëm si rritje ekonomike, por edhe si përmirësim të drejtpërdrejtë të jetës së njerëzve. Në arsim synohet të zvogëlohet diferenca mes shkollave urbane dhe rurale, ndërsa në shëndetësi të forcohen spitalet e qarqeve dhe të përdoren edhe teknologjitë digjitale dhe inteligjenca artificiale. Një vëmendje e madhe i kushtohet të moshuarve, përmes shërbimeve mjekësore, kujdesit në shtëpi dhe mbështetjes financiare, si dhe familjeve dhe individëve në vështirësi përmes strehimit të përballueshëm dhe ndihmës sociale. Pra, zona synon që vendi ku jeton një person (qytet apo fshat, zonë e zhvilluar apo më e varfër ) të mos përcaktojë më cilësinë e shërbimeve që ai merr, duke krijuar një rrjet më të barabartë të arsimit, shëndetësisë, pensioneve, strehimit dhe mbrojtjes sociale.
Fshati Zhouai, qytet Ningbo, provincë Zhejiang, 2023/Foto nga VCG
Një tjetër projekt madhor me origjinë në Zhejiang po merr famë kombëtare. “Dhjetë Mijë Fshatrat”, si një nga përvojat kryesore të shkruara në rekomandimet e qeverisë qendrore pas më shumë se 20 vitesh eksplorimi, praktike dhe thellimi, është bërë një paradigmë dhe metodë efektive për rigjallërimin rural.
Plani i “Dhjetë Mijë Fshatrave” lidhet me përpjekjen e Kinës për të përshpejtuar zhvillimin dhe modernizimin e zonave rurale, duke e vendosur fshatin në qendër të politikës së rigjallërimit rural. Qasja buron veçanërisht nga përvoja e provincës Zhejiang dhe programi i njohur si “Mijëra fshatra për demonstrim dhe dhjetë mijë fshatra për përmirësim”, i cili synon të përmirësojë në mënyrë të gjithanshme kushtet e jetesës, infrastrukturën, mjedisin dhe shërbimet publike në zonat rurale. Në planin politik, kjo qasje shkon përtej përmirësimit fizik të fshatrave: ajo synon të ngushtojë hendekun mes qytetit dhe fshatit dhe të sigurojë që përfitimet e zhvillimit ekonomik të shpërndahen më gjerësisht në shoqëri.
Në këtë kuadër, “Dhjetë Mijë Fshatrat” përfaqëson një mënyrë të të menduarit politik ku zhvillimi rural shihet si pjesë thelbësore e modernizimit kinez dhe e objektivit të prosperitetit të përbashkët. Përmirësimi i infrastrukturës, bujqësisë, arsimit, shërbimeve publike dhe mjedisit kombinohet me zhvillimin e industrive lokale, rritjen e të ardhurave të fermerëve dhe forcimin e ekonomisë rurale. Sot, mjedisi i jetesës rurale vazhdon të renditet ndër më të mirët në vend, duke shfaqur bukurinë e përgjithshme dhe shpirtin e Zhejiang-ut.
“Plani i Punës”
Komiteti Provincial i PKK-së dhe Qeveria Popullore e Provincës Zhejiang kanë shpallur Planin e Punës për të Promovuar Prosperitetin e Përbashkët si një Demonstrim Pilot në vitin 2026. Ky plan pune është formuluar për të thelluar zhvillimin e integrimit urban-rural. Ai lidhet ngushtë me objektivat e Planit të 15-të Pesëvjeçar, duke thelluar në mënyrë gjithëpërfshirëse reformat dhe duke përshpejtuar zbatimin e detyrave kryesore. Këto përpjekje synojnë të krijojnë një bazë të qëndrueshme për ta pozicionuar Zhejiang-un në pararojë të përpjekjeve për të paraqitur një pamje të gjallë të realizimit në thelb të modernizimit socialist.
Plani synon që zona të zhvillohet në mënyrë më të balancuar, në mënyrë që jo vetëm qytetet e mëdha si Hangzhou dhe Ningbo të përparojnë, por edhe qarqet malore, ishujt, qytetet e vogla dhe zonat rurale. Për këtë, provinca do të investojë më shumë në hekurudha, autostrada, porte dhe lidhje të tjera infrastrukturore, në mënyrë që qytetet dhe zonat rurale të lidhen më mirë dhe të përfitojnë nga zhvillimi ekonomik i njëra-tjetrës. Në zonat më pak të zhvilluara do të ketë politika dhe mbështetje të përshtatura sipas nevojave të çdo qarku, duke nxitur industri që krijojnë vende pune dhe të ardhura, si dhe bashkëpunimin mes kompanive dhe fshatrave. Paralelisht, qytetet e qarqeve do të modernizohen me infrastrukturë më të mirë, shërbime publike, mbrojtje nga përmbytjet, mjedis më të pastër dhe ekonomi të reja, ndërsa qytetet qendrore do të forcohen si pika që tërheqin investime, industri dhe shërbime për zonat përreth. Pra, ideja kryesore është që zhvillimi të mos përqendrohet vetëm në disa qytete të pasura, por të shpërndahet më gjerësisht në të gjithë Zhejiang-un, duke krijuar kushte më të barabarta për njerëzit dhe duke çuar përpara objektivin e prosperitetit të përbashkët.
Punëtoret e bujtinave rurale në një trajnim për gatim të organizuar nga bashkia e qytetit Jinhua, provincë Zhejiang,2024/Foto nga VCG
Pas arritjes së një niveli të moderuar prosperiteti, sfida e radhës për Kinën është zgjerimi i mëtejshëm i ekonomisë dhe sigurimi që frytet e këtij zhvillimi të përfitojnë një pjesë sa më të gjerë të popullsisë. Për këtë qëllim, theksi vihet te zhvillimi me cilësi të lartë, rritja e të ardhurave në zonat urbane e rurale dhe ngushtimi i hendekut të të ardhurave, duke shmangur polarizimin ekonomik.
Së fundmi, prosperiteti i përbashkët kuptohet më mirë jo si një kthesë e menjëhershme egalitare, por si një rikalibrim gradual dhe i menaxhuar politikisht i mënyrës së zhvillimit të Kinës, dhe kjo ka nisur nga Zhejiang-u. Agjenda e Kinës kuptohet më mirë si një përpjekje graduale dhe e menaxhuar nga shteti për të rikalibruar shpërndarjen pas një periudhe të gjatë në të cilën rritja ia kaloi barazisë. Strategjia është gjithëpërfshirëse, por e kujdesshme: ajo kërkon të moderojë pabarazitë pa braktisur rritjen dhe ambicjen.
Zhejiang-u është laboratori ku kjo ide po merr formë konkrete si një përpjekje për të lidhur zhvillimin me barazinë e mundësive, modernizimin me përfshirjen dhe rritjen me mirëqenien. Në këtë kuptim, prosperiteti i përbashkët nuk është një destinacion i arritur, por një proces politik dhe shoqëror në zhvillim, përmes të cilit Kina po përpiqet të përcaktojë jo vetëm sa shpejt zhvillohet, por edhe për kë dhe në ç’mënyre zhvillohet.
Burimi CGTN
