Zëvendëskryeministrja Albana Koçiu vlerësoi potencialin e Elbasanit për zhvillimin ekonomik dhe turistik, duke theksuar rolin e investimeve, bujqësisë dhe agroturizmit në krijimin e mundësive të reja për qytetarët.

Në një postim në rrjetet sociale, Koçiu u shpreh se Elbasani përfaqëson historinë e njerëzve të palodhur, sipërmarrësve me vizion dhe brezave që ruajnë vlerat e traditës, ndërsa hapin rrugën drejt së ardhmes.

Koçiu nënvizoi se, zona ka një potencial të jashtëzakonshëm, ku investimet në infrastrukturë, zhvillimi i bujqësisë dhe mbështetja për fermerët po shoqërohen me promovimin e agroturizmit, duke krijuar mundësi të reja ekonomike dhe sociale.

Koçiu theksoi se bukuritë natyrore, produktet cilësore, kultura, mikpritja dhe trashëgimia e pasur e Elbasanit përbëjnë një potencial të rëndësishëm për zhvillimin e turizmit.

“Elbasani po forcon rolin e tij si një destinacion i rëndësishëm dhe një motor i zhvillimit ekonomik të vendit”, u shpreh zëvendëskryeministrja.

Ajo nënvizoi se ndërthurja e traditës me investimet dhe zhvillimin e sipërmarrjes po i hap rrugë një perspektive të re për territorin, duke e pozicionuar Elbasanin si një qendër me rëndësi për ekonominë, bujqësinë dhe turizmin.

Burimi ATSH