Terminali i ri i pritjes së pasagjerëve dhe turistëve “Saranda Welcome Center” në Portin e Sarandës synon të përmirësojë përvojën e vizitorëve që mbërrijnë në qytet, veçanërisht gjatë sezonit turistik.

Prefektja e qarkut Vlorë, Evis Alushi së bashku me kryetarin e bashkisë Sarandë, Oltion Çaçi zhvilloi një vizitë në terminalin e ri “Saranda Welcome Center”, një investim që shërben si porta moderne e mirëseardhjes për qytetin.

Gjatë vizitës, prefektja Alushi u njoh nga afër me kushtet dhe shërbimet që ofron ky terminal.

Terminali i ri ka hapësira parkimi, ambiente në shërbim të vizitorëve dhe një organizim bashkëkohor të mobilitetit urban, duke lehtësuar qarkullimin dhe përmirësuar përvojën e qytetarëve dhe turistëve.

Prefektja Alushi vlerësoi se investime të tilla përfaqësojnë një hap të rëndësishëm në transformimin e Sarandës, duke kontribuar në rritjen e cilësisë së shërbimeve, forcimin e infrastrukturës turistike dhe krijimin e një destinacioni më funksional, më mikpritës dhe më tërheqës për vizitorët gjatë gjithë vitit.

Me rritjen e numrit të turistëve dhe kroçierave që vizitojnë Sarandën çdo vit, terminali luan një rol të rëndësishëm në menaxhimin e fluksit të pasagjerëve dhe në promovimin e qytetit si një nga destinacionet kryesore turistike të Shqipërisë.

Burimi ATSH