Universiteti i Arteve të Tiranës zhvilloi Konferencën e Dytë Ndërkombëtare mbi Artet dhe Edukimin.

Në konferencë u prezantuan rreth 95 punime shkencore nga rreth 105 pjesëmarrës nga Shqipëria, Kosova, Maqedonia e Veriut, Mali i zi, Italia dhe Greqia. Punimet u zhvilluan në sesione të dedikuara muzikës, trashëgimisë kulturore, edukimit, teatrit, aktrimit, koreografisë, arteve pamore dhe ndikimit të inteligjencës artificiale në art e kërkimin shkencor.

Konferenca kishte për qëllim promovimin e kërkimit shkencor dhe artistik, fuqizimin e bashkëpunimit ndërinstitucional dhe ndërkombëtar, si dhe nxitjen e dialogut ndërdisiplinor mbi sfidat dhe zhvillimet bashkëkohore të arteve.

Konkluzionet e sesioneve theksuan nevojën për një ndërveprim më të madh midis traditës dhe inovacionit, zgjerimin e përdorimit të teknologjive digjitale dhe inteligjencës artificiale në proceset krijuese dhe studimore, forcimin e kërkimit mbi trashëgiminë kulturore dhe zhvillimin e mëtejshëm të bashkëpunimeve akademike në nivel rajonal dhe ndërkombëtar.

Konferenca dëshmoi se arti, edukimi dhe kërkimi shkencor përbëjnë dimensione të pandashme të zhvillimit kulturor bashkëkohor, duke forcuar rolin e Universitetit të Arteve si një qendër referimi për dialogun akademik dhe krijues në hapësirën shqiptare dhe më gjerë.

Burimi ATSH