Ministri i Turizmit, Kulturës dhe Sportit, Blendi Gonxhja, së bashku me kryetarin e bashkisë Korçë, Sotiraq Filo, inspektuan punimet për restaurimin e Kullës së Turanit, Monument Kulture i Kategorisë I.

“Jemi këtu për të dhënë një tjetër lajm të mirë të prekshëm, që jo vetëm shpëtojmë një vlerë të trashëgimisë kulturore por edhe një atraksion që ka një vlerë turistike, por edhe identitare siç është Kulla e Turanit, një objekt shumë i rrezikuar, jo vetëm për të bërë ndonjë dëm ndaj vizitorëve, por edhe në kuptimin e humbjes së një vlere të jashtëzakonshme e të pakthyeshme”, tha ministri Gonxhja.

Ministri u shpreh se po kërkohen mundësi të tjera për ta rijetësuar, për të pasur kujdes të vazhdueshëm, që të ketë vlerë promocionale e turistike për zonën.

Kryebashkiaku Filo falënderoi ministrin për ndërhyrjen, që sipas tij ishte e domosdoshme, një kërkesë edhe e banoreve të fshatit Turan që ky objekt të restaurohej e mirëmbahej.

Monumenti me rëndësi të veçantë historike dhe arkitektonike i është nënshtruar punimeve për restaurimin dhe konsolidimin.

Kulla e Turanit është një monument i përfshirë në listën e objekteve në rrezik të Drejtorisë Rajonale të Trashëgimisë Kulturore Korçë.

Ndërhyrjet, të financuara nga fondi i MTKS për rastet emergjente, përfshijnë konsolidimin e muraturave, trajtimin e çarjeve, restaurimin e kupolës dhe çatisë, si dhe përmirësimin e mbrojtjes nga lagështira.

Krahas shpëtimit dhe stabilizimit të monumentit, synohet edhe rivitalizimi i tij si pjesë e itinerareve turistike dhe kulturore të zonës, duke ruajtur autenticitetin dhe vlerat e tij historike për brezat e ardhshëm.

Burimi ATSH