Presidenti Bajram Begaj shprehu sot ngushëllimet për vrasjen në krye të detyrës të efektivit të Forcave “Shqiponja”, 34-vjeçarit Enea Mekolli në malin Boden, bashkia Maliq.

“Bashkohem thellësisht me dhimbjen për humbjen tragjike të jetës në krye të detyrës të policit Enea Mekolli dhe plagosjen rëndë të kolegut të tij, Edison Adri”, u shpreh Begaj.

Presidenti i shprehu familjes ngushëllimet dhe solidaritetin më të lartë në emër të shtetit shqiptar në këtë ditë mjaft të rëndë për ta.

Begaj i uroi shërim të plotë dhe sa më të shpejtë punonjësit të Policisë së Shtetit, i cili mbeti i plagosur.

“Policia e Shtetit nuk do të zmbrapset nga kjo humbje e do ta kthejë dhembjen në forcë e vendosmëri për të luftuar krimin në çdo skutë”, theksoi Begaj.

Kreu i Shtetit nënvizoi se, populli shqiptar është masivisht përkrah policisë në mbrojtje të sigurisë dhe rendit publik.

Efektivi i Forcave “Shqiponja” mbeti i vrarë dhe një tjetër u plagos nga sulmi me armë zjarri nga një person i kërkuar i cili u neutralizua dhe u plagos gjatë shkëmbimit të zjarrit gjatë një operacioni për kapjen e tij.

Shërbimet e Policisë i kanë bërë thirrje të kërkuarit të dilte dhe të dorëzohej, por ai nuk i është bindur thirrjes së Policisë dhe ka hapur zjarr në drejtim të punonjësve të Policisë, ku për pasojë ka humbur jetën punonjësi i Policisë, inspektor E. M., 34 vjeç, dhe ka mbetur i plagosur punonjësi i Policisë, inspektor E. A., 36 vjeç (të dy punonjës të Forcës së Posaçme “Shqiponja” të DVP Korçë)”

/Marrë nga ATSH