Operatori i Blerjeve të Përqendruara (OBP) hapi procedurën e prokurimit për përzgjedhjen e kompanisë konsulente ndërkombëtare, e cila do të asistojë në hartimin e kuadrit strategjik, institucional dhe operacional për ngritjen e Bankës Shqiptare të Zhvillimit.

Sipas dokumenteve të procedurës, synimi është të përzgjidhet një kompani me eksperiencë të konsoliduar në ngritjen dhe funksionalizimin e institucioneve financiare zhvillimore, me qëllim që Banka Shqiptare e Zhvillimit të bëhet funksionale në një afat sa më të shpejtë.

Projekti konsiderohet një nga nismat më të rëndësishme të viteve të fundit në drejtim të forcimit të instrumenteve shtetërore për financimin e zhvillimit ekonomik dhe mbështetjen e sektorit privat.

Banka Shqiptare e Zhvillimit pritet të ketë një rol kyç në financimin e ekonomisë, veçanërisht të bizneseve të vogla dhe të mesme, përmes produkteve financiare dhe mekanizmave mbështetës me kushte lehtësuese.

Një tjetër komponent i rëndësishëm i projektit lidhet me zgjerimin e aksesit në shërbimet financiare në të gjithë territorin e vendit, përmes përdorimit të rrjetit të Postës Shqiptare.

Kjo nismë synon të rrisë përfshirjen financiare, sidomos në zonat ku shërbimet bankare mbeten të kufizuara.

Edhe pse si shoqëri aksionare Banka Shqiptare e Zhvillimit nuk kishte detyrim ligjor për zhvillimin e procedurave të prokurimit përmes organit qendror blerës, institucioni ka zgjedhur vullnetarisht t’ia besojë këtë proces Operatorit të Blerjeve të Përqendruara.

Ky vendim vlerësohet si një tregues i angazhimit për transparencë, profesionalizëm dhe respektim të standardeve në proceset publike të përzgjedhjes.

Me nisjen e kësaj procedure, projekti hyn në një fazë konkrete zbatimi, ndërsa autoritetet synojnë që institucioni i ri financiar të shërbejë si një instrument i rëndësishëm për zhvillimin ekonomik të vendit, mbështetjen e investimeve dhe forcimin e sipërmarrjes shqiptare.

Burimi ATSH