Ministri i Drejtësisë, Toni Gogu, tha sot amnistia penale, e cila parashikon lirimin e menjëhershëm të 447 personave dhe ulje dënimesh për qindra të tjerë, do të miratohet brenda këtij sesioni parlamentar.

Sipas Gogut, amnistia është një instrument i politikës penale i hartuar për të adresuar problematikat e mbipopullimit në burgje dhe për të fuqizuar të drejtat e njeriut.

Sipas tij, ministria e Drejtësisë, ka përfunduar tashmë punën për hartimin e draftit, ndërsa në javët në vijim pritet të nisë shqyrtimi i tij në Parlament.

“Amnistia penale, është një instrument i politikës sonë penale që u dizenjua për të adresuar disa problematika, në radhë të parë fuqizimin e të drejtave të njeriut dhe nga ana tjetër kjo ka të bëjë me situatën që kemi me popullimin në burgje. Do të ndodhë, patjetër”, shtoi Gogu.

“Nga ana tjetër jemi treguar shumë të kujdesshëm që në të gjithë procesin që kemi të avancimit të vendit drejt anëtarësimit, t’i shqyrtojmë prioritetet sipas rëndësisë që atyre u takon. Amnistia është në parlament dhe unë besoj që shumë shpejt, pasi të kemi marrë vlerësimin për kapitullin e “Themeloreve”, do të fillojmë të merremi me amnistinë, me vëmendjen që i takon. Në ditët në vijim, besoj që do të fillojë diskutimi në parlament. E sigurt që do të ndodhë brenda këtij seioni parlament”, tha ai.

Në total janë 447 të burgosur që pritet të përfitojnë direkt nga amnistia, ndërkohë që për 853 të burgosur të tjerë do të ketë ulje dënimi. Nga Shërbimi i Provës amnistohen 5,077 të dënuar me masa alternative.

Burimi ATSH