Shfaqja “Otello” është cilësuar si një nga sukseset në skenën e Teatri Kombëtar, duke tërhequr vëmendjen e artdashësve dhe publikut të gjerë.

Ministri i Turizmit, Kulturës dhe Sportit, Blendi Gonxhja, ndau në rrjetet sociale momente nga shfaqja, si dhe pamje nga publiku i pranishëm në sallë, duke e vlerësuar produksionin si një nga ngjarjet më të rëndësishme të sezonit artistik.

“Një nga tragjeditë më të fuqishme të William Shakespeare vjen në ‘ArTurbina’, nën regjinë e Qëndrim Rijani, duke sjellë një interpretim bashkëkohor të dramës së pushtetit, xhelozisë, dashurisë dhe manipulimit”, shkruan Gonxhja në postimin e tij.

Shfaqja vjen me përkthimin e njohur të Fan Noli, ndërsa në skenë interpretojnë një kast i gjerë aktorësh të njohur të teatrit shqiptar.

Në role kryesore janë Arben Derhemi, Lulzim Zeqja, Linda Jarani, Donald Shehu, Luli Bitri, Viktor Zhusti, si dhe artistë të tjerë të njohur të skenës.

Ministri u shpreh se “Otello” konsiderohet një produksion i rëndësishëm që pasuron jetën artistike dhe teatrale në vend, duke sjellë një interpretim bashkëkohor të një prej veprave më të mëdha të dramaturgjisë botërore.

Burimi ATSH