Projekti për rivitalizimin e Kalasë së Elbasanit, nismë që synon transformimin e saj në një destinacion të rëndësishëm kulturor dhe turistik pati prezantimin e parë zyrtar.

Në ceremoninë e prezantimit morën pjesë Kryeministri Edi Rama, ministri i Turizmit, Kulturës dhe Sportit, Blendi Gonxhja, kryetari i Bashkisë Elbasan, Gledian Llatja, si dhe përfaqësues të Albanian-American Development Foundation.

Projekti u prezantua nga arkitekti Emre Arolat, në bashkëpunim me MVM Architecture.

Ndërsa solli momente nga aktiviteti, ministri Gonxhja theksoi se ky projekt synon rikthimin e identitetit historik dhe vlerave arkeologjike të kalasë, si dhe integrimin e saj në jetën e përditshme të qytetit.

“Ky është prezantimi i parë zyrtar i një projekti që synon transformimin e Kalasë së Elbasanit në një destinacion të rëndësishëm kulturor dhe turistik, duke i rikthyer identitetin historik dhe rolin e saj në jetën e qytetit”, u shpreh Gonxhja.

Ai bëri të ditur se projekti parashikon ndërhyrje të integruara për përmirësimin e hapësirave publike dhe zhvillimin e potencialit turistik.

“Synimi ynë është ta kthejmë Kalanë në një motor të ri zhvillimi ekonomik dhe kulturor për Elbasanin, përmes rijetëzimit të zonës historike dhe rritjes së atraktivitetit për vizitorët”, tha ministri.

Pas këtij prezantimi, pritet vijimi i procedurave institucionale dhe rakordimi ndërmjet palëve përkatëse deri në miratimin përfundimtar të projektit.

Hartimi i projektit financohet nga Albanian-American Development Foundation, e cila sjell ekspertizë nga arkitektë të njohur ndërkombëtarë dhe vendas për realizimin e kësaj nisme.

Kalaja e Elbasanit është Monument Kulture i Kategorisë I. Studime arkeologjike kanë zbuluar teknikat e ndërtimit dhe historinë e saj. Kalaja përfaqëson një kastrum klasik, e cila i përmbahet rregullave të ndërtimit romak.

Sot në brendësi të kalasë ka ndërtesa karakteristike të shpallura për nga rëndësia dhe arkitektura si monumente kulture, teka është një nga objektet më të vizituara në Elbasan, nga turistët e huaj.

Burimi ATSH