Dita Ndërkombëtare e Gjuhës Kineze e OKB-së u përkujtua në Tiranë me një veprimtari të organizuar nga Instituti “Konfuci” dhe Fakulteti i Gjuhëve të Huaja në mjediset e këtij institucioni universitar. E pranishme në veprimtari, ambasadorja e Republikës Popullore të Kinës në Shqipëri, Pang Chunxue, tha se kinezishtja është një pjesë e rëndësishme e qytetërimit kinez dhe karakteret kineze mëshirojnë mençurinë e Lindjes.

“Kjo veprimtari shërben për një njohje më të mirë të Kinës”,- tha ajo.

Veprimtarinë e përshëndeti edhe dekania e Fakultetit të Gjuhëve të Huaja, prof. dr. Esmeralda Kromidha.

Foto nga CMG

“Gjuha kineze mësohet në Institutin “Konfuci”, pjesë e Universitetit të Tiranës, por është edhe pjesë e programeve universitare e Fakultetit të Gjuhëve të Huaja. Të mësosh gjuhën kineze me një histori 5 mijë vjeçare, mëson të kaluarën tradicionale të Kinës, por edhe modernizimin e saj. Gjuha kineze njëkohësisht është edhe gjuhë e teknologjisë dhe e zhvillimit ekonomik. Ajo shërben si një urë lidhëse mes vendit tonë dhe Kinës”,- tha dekania Kromidha.

Studentë shqiptarë të Fakultetit të Gjuhëve të Huaja dhe Historisë si dhe studente kineze, që studiojnë gjuhën shqipe në Universitetin e Gjuhëve të Huaja të Pekinit, u bënë pjesë e konkurseve të kulturës së çajit kinez, shkrimit të karaktereve kineze, si dhe u njohën me veshjet tradicionale kineze, me të cilat bënë fotografi të shumta. Ata shijuan çajin kinez, konkurruan në lojërat e organizuara në stendat e veprimtarisë dhe falë njohurive të tyre për gjuhën dhe kulturën kineze u shpërblyen me dhurata.

Organizata e Kombeve të Bashkuara ka gjashtë gjuhë zyrtare: arabisht, kinezisht, anglisht, frëngjisht, rusisht dhe spanjisht. Ajo shpalli në vitin 2010 nismën për festimin e Ditëve të Gjuhëve të OKB-së. Kjo nismë synon të festojë përdorimin e shumë gjuhëve dhe diversitetin kulturor, si dhe të promovojë përdorimin e barabartë të gjuhëve zyrtare brenda OKB-së. Më 20 prill të vitit 2010 u propozua Dita e Gjuhës Kineze, në përputhje me termin tradicional kinez “Shiu i Drithërave”, për të përkujtuar kontributin e Cangjie, shpikësit legjendar të shkrimit kinez.

Dita e Gjuhës Kineze është kthyer në një dritare për njerëzit që të njohin kulturën kineze. Çdo vit, rreth kësaj dite, në selinë e OKB-së në Nju Jork por edhe në shumë qytete anembanë botës organizohen aktivitete të ndryshme, si ekspozita arti, forume për mësimin e gjuhës kineze, ligjërata, si dhe prezantime të modës dhe operës tradicionale për të treguar bukurinë dhe pasurinë e gjuhës dhe kulturës kineze.

Në vitin 2009, UNESCO e përfshiu kaligrafinë kineze, e cila ka një histori prej më shumë se 3000 vjetësh, në Listën Përfaqësuese të Trashëgimisë Kulturore Jomateriale të Njerëzimit.

Burimi CGTN