Ministri i Turizmit, Kulturës dhe Sportit, Blendi Gonxhja njoftoi sot se Manastiri i Kryeengjëjve në Derviçan shpallet “Monument Kulture”, Kategoria I dhe se shumë shpejt do të fillojë puna për ta rikthyer manastirin të jetueshëm.

Ministri tha se, në bashkëpunim me Drejtorinë Rajonale të Trashëgimisë Kulturore Gjirokastër është realizuar shpallja e kishës si pasuri kulturore “Monument Kulture” i kategorisë së parë, si dhe përcaktimi i zonës së mbrojtur për konakët, duke garantuar mbrojtjen ligjore të të gjithë ansamblit.

Miratimi i projektit hap rrugën për nisjen e punimeve të zbatimit, të cilat synojnë rikthimin e funksionit dhe jetueshmërisë së manastirit, duke e kthyer atë në një hapësirë të gjallë për komunitetin dhe trashëgiminë kulturore, si dhe duke pasuruar itineraret turistike të vendit.

Kjo do të jetë ndërhyrja e parë e plotë për ringritjen e konakëve, të cilët aktualisht janë në gjendje të degraduar. Ajo përfshin pastrimin, konsolidimin e muraturës dhe rindërtimin e elementeve tradicionale si çatitë, dyshemetë dhe strukturat prej druri.

Manastiri i Kryeengjëjve është një nga ansamblet më të rëndësishme shpirtërore dhe arkitekturore të Derviçanit, me vlera të spikatura historike dhe identitare. Kompleksi, i përbërë nga kisha dhe konakët, dëshmon traditën e ndërtimit në gur dhe organizimin e jetës monastike ndër shekuj.

Kreu i MTKS-së tha se, së bashku me kryebashkiakun e Dropullit, Dhimitraq Toli dhe organizatat partnere, po punohet për shpëtimin, rijetëzimin dhe promovimin e objekteve e qendrave historike si dhe restaurimin e evokimin e vlerave kulturore përmes statuseve mbrojtëse që mobilizojnë financime projektesh e rimëkëmbje ekonomike lokale të qëndrueshme.

Burimi ATSH