Guvernatori i Bankës së Shqipërisë, Gent Sejko, zhvilloi një takim me Antonella Bassani, zëvendëspresidente për Evropën dhe Azinë Qendrore në Bankën Botërore, Xiaoqing Yu, drejtore Rajonale për Ballkanin Perëndimor, si dhe Alfonso García Mora, zëvendëspresident Rajonal i IFC-së, në kuadër të bashkëpunimit të vazhdueshëm institucional.

Gjatë takimit u diskutuan zhvillimet më të fundit ekonomike dhe financiare në Shqipëri, të cilat u vlerësuan si pozitive, me rritje të qëndrueshme ekonomike, inflacion të ulët dhe forcim të stabilitetit financiar.

U theksua roli i Bankës Botërore në mbështetjen e reformave në vend, përfshirë programet e mëparshme si FINSAC, si dhe rëndësia e vijimit të bashkëpunimit në projekte me ndikim strategjik për modernizimin e sistemit financiar.

Në fokus të diskutimeve ishin edhe zhvillimet në sektorin bankar, i cili u vlerësua si i qëndrueshëm dhe i mirëkapitalizuar, me rritje të aktivitetit kreditues, përmirësim të cilësisë së portofolit dhe nivele të larta likuiditeti.

Takimi rikonfirmoi angazhimin e përbashkët për forcimin e stabilitetit financiar, menaxhimin e rreziqeve dhe avancimin e reformave që synojnë integrimin e mëtejshëm të Shqipërisë në sistemin financiar evropian dhe ndërkombëtar.

Burimi ATSH