Ministri për Evropën dhe Punët e Jashtme, Ferit Hoxha zhvilloi sot një takim me deputetin e vetëm shqiptar në Parlamentin e Serbisë, Shaip Kamberi, si dhe me kryetarin e Këshillit Kombëtar të Shqiptarëve në Luginën e Preshevës, Enkel Rexhepi.

Hoxha vlerësoi rolin përfaqësues dhe kontributin e Kamberit, i cili, theksoi ministri, “edhe pse i vetëm, është një zë i fortë i shqiptarëve në Parlamentin e Serbisë, si edhe angazhimin e tyre të përbashkët për adresimin e çështjeve që prekin komunitetin shqiptar në Luginën e Preshevës, përfshirë edhe në forume ndërkombëtare”.

Hoxha nënvizoi vëmendjen e veçantë me të cilën qeveria shqiptare dhe Ministria për Evropën dhe Punët e Jashtme ndjekin situatën e shqiptarëve në Serbi, si dhe përkushtimin e palëkundur për mbrojtjen dhe avancimin e të drejtave të tyre, në përputhje me standardet evropiane dhe ndërkombëtare.

“Respektimi i të drejtave të shqiptarëve në Serbi, përfshirë identitetin kombëtar, gjuhën, kulturën, përfaqësimin e drejtë dhe zhvillimin ekonomik, mbetet një element thelbësor në ecurinë e marrëdhënieve dypalëshe me Serbinë”, theksoi Hoxha.

Hoxha shtoi se MEPJ do të vijojë të bashkëpunojmë ngushtë me të gjithë përfaqësuesit zyrtarë të shqiptarëve në Luginën e Preshevës.

“Do të vijojmë të bashkëpunojmë ngushtë me të gjithë përfaqësuesit zyrtarë të shqiptarëve në tri komunat atje, si dhe me partnerët tanë ndërkombëtarë, për të adresuar sfidat me të cilat përballen shqiptarët atje dhe për të garantuar respektimin e të drejtave të tyre për dinjitet, barazi dhe zhvillim”, theksoi Hoxha.

Burimi ATSH