Ministri i Infrastrukturës dhe Energjisë, Enea Karakaçi inspektoi sot ecurinë e punimeve në kantierin e zgjerimit të autostradës Tiranë–Durrës, ku punimet kanë hyrë në fazën përfundimtare.

Gjatë inspektimit, Karakaçi theksoi rëndësinë e këtij aksi, i cili konsiderohet më i ngarkuari në vend, pasi përballon fluksin e mjeteve nga veriu, lidhjen me Aeroportin e Rinasit dhe me Portin e Durrësit.

Ministri u shpreh se punimet në 6 kilometrat e para kanë qenë sfiduese, për shkak të përpjekjeve për të mos penguar qarkullimin e mjeteve, duke falënderuar qytetarët për mirëkuptimin.

“Punimet kanë ecur me ritme të larta, por dimri i lagësht ka ndikuar në vonesën e asfaltimit. Megjithatë, jemi brenda afateve të kontratës dhe synojmë përfundimin e tyre në muajin korrik”, deklaroi Karakaçi.

Ai bëri të ditur se aktualisht punimet janë përqendruar në lotin e parë, ku po vijon procesi i asfaltimit. Sipas tij, në këtë aks qarkullojnë rreth 90 mijë mjete në ditë gjatë javës, ndërsa ndërhyrjet synojnë përmirësimin e standardeve dhe cilësisë së rrugës.

Ministri nënvizoi se po aplikohen teknologji të reja në asfaltim dhe se autostrada do të ketë 3+1 korsi, sipas standardeve më të mira. Ai shtoi se brenda javës së parë të muajit maj pritet hapja e segmentit për qarkullim, çka do të lehtësojë ndjeshëm trafikun në prag të sezonit turistik, ndërsa në vijim do të realizohet edhe arredimi urban.

Karakaçi informoi gjithashtu se punimet po vijojnë me ritme të shpejta edhe në akset Kashar–Lekaj dhe në bajpasin e Tiranës, ku deri tani është realizuar rreth 20% e punimeve.

Burimi ATSH