Ambasadori i Shqipërisë në Kosovë, Petrit Malaj, reagoi në rrjetet sociale në lidhje me rezultatet e vizitës së Ministrit të Bujqësisë dhe Zhvillimit Rural i Shqipërisë, Andis Salla, në Kosovë, të fokusuar në prioritetet e bashkëpunimit dypalësh në sektorin e bujqësisë.

POSTIMI I AMBASADORIT PETRIT MALAJ

Me ftesë të Ministrit të Bujqësisë, Pylltarisë dhe Zhvillimit Rural të Republikës së Kosovës, më 2–3 prill 2026, Ministri i Bujqësisë dhe Zhvillimit Rural i Shqipërisë, z. Andis Salla, zhvilloi një vizitë zyrtare në Kosovë.

Gjatë kësaj vizite, pata kënaqësinë të ndjek nga afër takimin ndërmjet dy ministrave, si dhe zhvillimin e bisedimeve të zgjeruara ndërmjet stafeve përkatëse, të fokusuara në prioritetet e bashkëpunimit dypalësh në sektorin e bujqësisë.

Një moment veçanërisht kuptimplotë ishte vizita në Kooperativën Bujqësore Krusha, ku delegacioni u prit me shumë respekt nga znj. Fahrie Hoti ,një grua që ka dëshmuar forcë dhe frymëzim të jashtëzakonshëm, duke ndërtuar një model suksesi dhe fuqizimi për gratë e zonës.

Kjo vizitë pritet të ndikojë drejtpërdrejt në forcimin e komunikimit dhe të bashkëpunimit ndërmjet dy vendeve, përmes:
▪️ rritjes së kapaciteteve plotësuese,
▪️ zbatimit të marrëveshjeve ekzistuese,
▪️ adresimit të sfidave të përbashkëta,
▪️ dhe përafrimit të legjislacionit me standardet e Bashkimit Evropian.

Vizioni ynë i përbashkët synon avancimin e bashkëpunimit afatgjatë, rritjen e standardeve në sigurinë ushqimore dhe zhvillimin e qëndrueshëm bujqësor, në të mirë të qytetarëve të Shqipërisë dhe Kosovës.

(Marrë nga faqja zyrtare në Facebook e Ambasadës)